PR Lú Olo preokupa implementasaun lei arte marsiál

Prezidenti Repúblika (PR), Francisco Guterres ‘Lú Olo’, preokupa ho implementasaun lei arte marsiál, tanba lei ne’e forte maibe implementasaun iha terenu mak la rigor.

Sekretariu Estadu Juventude no Desportu, Nélio Isaac hato’o lia hirak ne’e, hafoin enkontru ho Prezidente Repúblika, iha Palásiu Prezidensiál Nicolau Lobato, Bairu Pite – Díli, Segunda (22/04/2019).

Sekretariu Estadu Juventude no Desportu ho Komisaun Reguladora Arte Marsiais (KRAM), hasoru malu ho Prezidente Repúblika, hodi informa konaba ezisténsia KRAM ne’ebé dura ona tinan 10.

Durante iha sorumutu ne’e, Prezidente Repúblika Francisco Guterres Lú Olo, preokupa ho implementasaun Lei Arte Marsiais, tanba tuir Xefe Estadu, maske lei arte marsiais ne’e iha forte, maibé la rigór iha nia implementasaun iha terrenu.

“Prezidenti Repúblika preokupa liu-liu kona-ba lei, implementasaun la diak problema saida, tanba ne’e prezidenti dehan ita tenke mai ho ideas rua, bele rezolve asuntu politiku nomos asuntu kona-ba lei arte marsiais ne’e,” Sekretario Estadu.

Governante ne’e afirma, nia sei aprezenta preokupasaun Xefe Estadu ne’e ba Governu no Parlamentu Nasionál iha tempu badak.

Nune’e mós, Sekretariu Estadu Joventude no Desportu ho KRAM  hato’o sira nia pontu de vista ba Prezidenti Repúblika katak laiha fatin ba arte marsiais atu reativa arte marsias ne’ebé Governu taka ho rezolusaun.

“Laiha razoins ida neste momentu atu fó opurtunidade ba arte marsiais atu tolu ne’e atu loke,” deklara, SEJD.

Enkuantu, grupu arte marsiais ne’ebé Governu desidi taka ho rezolusaun mak hanesan husi Persaudaran Setia Hati Terate (PSHT), Kmanek Oan Rai Klaran (KORK) no Ikatan Kera Sakti (IKS), tanba konsidera membru sira husi grupu arte marsiais hirak ne’e  sempre involve aktu konflitus.

Nunee mos antes eis membru arte marsiais husi PSHT, KORK no IKS husu ba Governu no Parlamentu Nasional atu altera rezolusaun Governu númeru (16 / 2013) no altera Lei Armas Brankas númeru (5/2017) molok reativa arte marsiais ne’ebé Governu desidi taka.Eus