Komunidade sira ne’ebé hela iha área protezidu prontu sai

Maske  antes ne’e Governu monta ona plaka iha  fatin protezidu hanesan, Tasi ibun, mota ninin no ponte okos, maibé komunidade sira ulun to’os hodi kontinua konstro’e uma iha fatin sira ne’e, hodi hela.

Maske nune’e, komunidade sira ne’ebé hela iha área protezidu sira ne’e pronto sai, bainhira Governu haruka, maibé tenki ho kondisaun.

Komunidade  Novania Mendonça Sarmento, hateten, sira pronto sai  banhira Governu presiza fatin refere atu halo dezenvolvimentu,  maibé Governu tenki kria kondisaun ba sira, tanba komunidade sira hela iha tasi ibun ne’e, balun hela tinan lima resin ona.

 “Ami prontu atu sai hodi koopera ho Governu, maibé ita hatene hahú iha tinan 2002  to’o agora Governu seidauk  monta plaka iha área protezidu hanesan tasi ibun, mota ninin no ponte okos, nune’e halo komunidade barak mak hari’i uma hodi uza fatin ne’e loke kios no balun hela permanente. Ne’eduni, bainhira Governu atu hasai tenki kria uluk kondisaun ida ba ami,  atu  nune’e bele kontinua halo fila liman hodi hatutan moris”,  hateten Novania Mendonça Sarmento ba GMN iha Meti-Aut Díli, Tersa (14/05/2019).

Noviana hatutan,  sira halo uma iha área tasi ibun, tanba  sosa husi ema, no sira iha dokumentus  husi Agraria no Serve.  Tanba ne’e wanhira atu hasai, tenki kria uluk kondisaun ba sira.

“Ami prontu atu sai, maibé Governu hatudu fatin ba ami para bele kontinua  halo restorante hodi buka moris, tanba rai ne’ebé  uza halo restorante ne’e, sosa no iha dokumentus kompletu”, relata Novania.

Nune’e mós, Xefe Suku Meti-Aut, Julio da Costa Xavier, informa, antes Governu atu hasai, presiza  buka kondisaun ba nia povu sira ne’e, atu nune’e povu bele kontinua buka moris, tanba povu mak Estadu, no Estadu mak povu.

“Nai ulun sira ukun ema, la’os ukun rai.  Komunidade hela iha  tasi ibun prontu atu sai, maibé tenki kria kondisaun uluk ba sira”,  hateten Julio.

Tuir planu, tinan  ne’e Governu planu ona atu tau plaka iha área tasi ibun, nune’e komunidade labele halo uma iha tasi ibun.

Tuir observasaun jornalista GMN, komunidade sira kontinua konstro’e uma permanente  iha área sira ne’ebé mak protezidu, maske sira hatene katak, rai ne’e área protezidu.

Tuir lei rai númeru 13/2017 artigu 8, hateten, husi laloran nia rohan  metru 50 mai rai maran ne’e, área protezidu. Ida ne’e  signifika Estadu nia rai, no Estadu mak administra.aba