Sosiedade sivíl husu PR Lú Olo veta alterasaun LFP

Sosiedade Sivíl ne’ebé hamahon-an iha Organização Não Governamental Timor-Leste (FONGTIL),  hato’o sira-nia preokupasaun katak, artigu 15 proposta  alterasaun Lei Fundu Petrolíferu (LFP), no lei atividade petrolífera, iha nia operasaun sei prejudika ba sustentabilidade, tanba investimentu ne’ebé halo dívida privadu liu husi empreza públika Timor GAP, sei  la garante reimbolsu no retornu ba fundu  petrolíferu.

“Iha biban ida ne’e FONGTIL hamutuk ho memnbru tomak, hato’o parabens ba povu no Estadu Timor-Leste ba vitória ida ne’ebé mak Timor-Leste hetan ona nia fronteira tasi, hodi kompleta soberania Timor-Leste, liu husi fronteira difinitivamente ho governu Australia ne’ebé mak sei troka nota ratifikasaun iha loron 30 fulan Agusto tinan 2019”, relata Porta voz António da Costa ba Jornalista sira liu husi Konferensia ba imprensa ne’ebé hala’o iha salaun enkontru  Fongtil  Segunda (8/05/2019) Kaikoli Díli.

“Hanesan ami hakerek no ko’alia liu husi ami nia submisaun sira ne’ebé ami hato’o ba Parlamentu Nasional, no fahe ba públiku kona ba ami nia preokupasaun, liga ho proposta alterasaun lei fundu  petrolíferu no lei atividade petrolíferas, ami preokupa alterasaun ida ne’e, liu-liu kona ba artigu 15 proposta alterasaun lei fundu petrolíferu, ne’ebé premite fundu  petrolíferu atu uza iha operasoens petrolíferu”, hatutan António.

Nia akresenta tan,  alterasaun lei ne’e prezudika ba sustentabilidade husi fundu petrolíferu, tanba investimentu ne’ebé mak halo dívida privadu liu husi empreza públiku hanesan Timor gap, sei la garantia reimbolsu no retornu ba fundu petrolíferu, investimentu konsentradu iha setór petróleo sei prezudika no abandona setór sosial no ekonómiku.

“Ho razaun ida ne’e, ami sosiedade sivíl Timor-Leste, ho respeitu husu Prezidenti Repúblika Francisco Guterres Lú Olo, atu veta proposta Lei Fundu Petrolíferu no Lei Atividade Petrolífera, liu husi konferensia imprensa ne’e mós, ami husu ba Prezidenti Repúblika atu promulga ka haruka publika rezolusaun Parlamentu Nasionál kona ba ratifikasaun Fronteira Marítima”,eklarese porta voz ne’e.oly