Bis la para iha Terminal, PNTL sei “aperta” motorista

Segundu Komandante PNTL munisípiu Díli  Superintendente Assistente Euclides Belo, hateten, ba oin Polísia seksaun Tránzitu  sei aperta motorista bis ne’ebé mak ulun toos la la para iha Terminal.

“Bis sira nia para fatin hodi hatún no hasa’e pasajeirus  iha terminal Bekora no iha terminal Taibessi no iha terminal Tasitolu. Dala ruma  PNTL nia observasaun terminal sira mamuk Bis sira para arbiru de’it. Tanba ne’e mak hakarak ka lakohi ami eduka sira para disiplina, la’os de’it komemora loron 30 Agostu mak kareta sira para disiplina, maibe ba oin ami sei aperta sira diak liu tan”,esplika  Segundu Komandante PNTL munisípiu Díli  Superintendente Assistente Euclides Belo, ba  jornalista sira  Segunda (16/09/19) iha Kuartel PNTL Díli. Hafoin orienta membru Trânzitu prende Bis dirésaun Díli Lospalos, ne’ebé mak para iha Sional  hodi hein no tula pasajeirus.

Nia  dehan, kestaun kareta para fatin to’o ka lae iha terminal sira,  kondutor ho autoridade  kompetente mak bele rezolve hodi bele utuliza terminal sira bele para ho diak.

“Agora Bis sira mai para iha Kuartel PNTL  ne’e tanba sira komete infrasaun la para iha terminal. Tan ne’e ami sei eduka motorista sira para sira kumpri nafatin regras trânzitu”,dehan Euclides Belo.

Tuir tabela infrasaun   bazeia ba diploma  ministerial  númeru 2 ho númeru 3/2003/  hatun  no  tula pasajeirus la’os iha fati  terminais  sei selu multa osan dolar 10 to’o dolar 30.avi