KJMA preokupa labarik menoridade fa’an sasan iha Díli

Konsellu Juventude Munisípiu Aileu (KJMA) senti preokupadu teb-tebes ho labarik menoridade sira kontinua fa’an sasan ou buka osan iha kapital Díli, maski governu liu husi Ministériu Solidaridade Sosial no Inkluzaun (MSSI) fó apoiu ba kbi’it la’ek sira, maibé situasaun hanesan ne’e kontinua akontese.

“Joven sira iha munisípiu Aileu preokupa bainhira haree labarik minoridade kontinua fa’an sasan iha dalan ninin, liu-liu iha kapital Díli, maski MSSI kontinua fó apoiu ba kbi’it la’ek sira”, reprezentante KJMA, Jacinto do Rego ba GMN, hafoin partisipa semináriu ba loron daruak iha munisípiu Aileu, Sesta (27-09-2019).

Hatán ba preokupasaun ne’e, Prezidenti Komisaun F Parlamentu Nasional (PN), Maria Barreto hateten, kona-bá ida ne’e kabe ba Sekretariadu Estadu Formasaun Profisional no Empregu (SEPFOPE), maibé husu ba governu  atu aselera la-lais lei, lori ba iha Konsellu Ministru (KM) aprova lei konsellu protesaun ba labarik sira.

Enkuantu tuir konstituisaun RDTL artigu 18 protesaun ba labarik sira, iha alinea 1 hateten, labarik sira iha direitu ba protesaun sivil husi família, komunidade no mós Estadu, liu-liu hasoru hahalok hotu hanesan la tau matan, diskriminasaun, violénsia, presaun, abuzu sexual no explorasaun.

To’o notísia ne’e hatun  GMN ladauk halo konfirmasaun ho MSSI, Komisaun Direitu ba Labarik, inklui SEFOPE, liu-liu Diresaun Traballu Infantil. ety