JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN apoia umanitária ba vítima inséndiu iha Ermera no Liquiça

PN apoia umanitária ba vítima inséndiu iha Ermera no Liquiça

Parlamentu Nasionál (PN), liu husi Komisaun F ne’ebé trata asuntu saúde, seguransa sosial no igualdade jéneru, fó ona apoiu umanitáriu ba vítima inséndiu iha suku Urahou, postu administrativu Hatulia, munisípiu Ermera no mos Munisípiu Liquiça.

Segundu Vise Prezidenti PN, Luis Roberto, hateten, prezensa PN iha suku Urahou ne’e, la’os atu responde hotu problema hotu ne’ebé mak komunidade enfrenta, maibé ne’e hanesan sentidu umanu ida husi PN.

“Tuir Relatóriu ne’ebé Xefi suku Urahou aprezenta durante ne’e vítima inséndiu hetan ona apoiu husi instituisaun seluk. Ita fiar la’os atu responde máximu ita boot sira nia vida moris total, maibé ida ne’e, atu hakbi’it sofrementu ne’ebé ita boot sira hetan iha suku ida ne’e“, Segundu Vise Prezidenti PN ba jornalista sira iha suku Urahou-Ermera, Sábadu (23-11-2019).

Tuir Luis Roberto, loloos ne’e programa apoiu umanitária ne’e governu nini’an, maibé PN sai hanesan tilun no ibun hodi haforsa komunidade sira nia lian, liu husi komisaun sira halo identifikasaun.

“PN sei enkamiña ba governu hodi responde saída mak ita boot sira enfrenta, PN liu husi ninia komisaun halo verifikasaun no fiskalizasaun, ami meja PN mós konvida líder bankada hotu iha PN, tur hamutuk hodi deside mak foin mai ajuda ita boot sira iha ne’e”, tenik Segundu Vise Prezidenti PN ne’e.

Xefi suku Urahou, postu administrativu Hatulia, munisípiu Ermera, Alberto Soares, agradese ba governu, tanba la taka matan ba vítima insendiu sira.

“Ho akontesementu inséndiu ne’e, ita bele eduka malu, ita haree komunidade nia susar no terus durante inséndiu ne’ebé komunidade sira hasoru, apoiu umanitáriu VIII governu ne’e rápidu kompara ho governu anterior”, tenik Alberto Soares.

Inséndiu ne’e, akontese  iha loron 2, fulan Outubru, tinan ne’e, rezulta ahi-han uma hamutuk 233, inklui komunidade nia plantasaun kafe hamutuk 188.

Lee hotu :   Deskonfia “Zebra Metan” moras tumor, KO 25 husu Governu transfere urjente ba Malázia

Vítima inséndiu sinti mosu diskriminasaun

Husi parte seluk, Xefi suku Mau-Ubu, postu administrativu Hatulia munisípiu Ermera, Domingos Noronha, sinti mosu diskriminasaun iha apoiu umanitáriu husi instituisaun sira ba vítima inséndiu iha suku Mau-Ubu, tanba dau-daun ne’e sira foin hetan apoiu husi Sekretáriu Estadu Protesaun Sivíl no Ministériu Solidaridade Sosial no Inkluzaun (MSSI).

“Durante ne’e instituisaun sira haree liu deit mak suku Ura-Hou, maibé suku Mau-Ubu foin simu apoiu umanitáriu husi SEPS no MSSI, iha ha’u nia suku Mau-Ubu vítima inséndiu hamutuk 39, husi númeru ne’e anin sobu uma hamutuk 35 no ahi-han uma hamutuk 4, maski halo ona verifikasaun no hala’o re-verifikasaun husi SEPS mak orienta hodi halo re-verifikasaun, maibé 31 mak pasa, 8 la pasa, tanba kriteriu mak termina. Ha’u lamenta ho apoiu ne’e tanba sasan sira ne’e husi MSSI ho SEPS hatun dreita iha suku Mau-Ubu, maibé restu sira hatun tiha iha suku Urahou mak foin lori mai suku Mau-Ubu”, Xefi suku Mau-Ubu-Ermera ba jornalista sira, Sábadu (23-11-2019).

Hatán ba kestaun ne’e, Segundu Vise Prezidenti PN, Luis Roberto, klarifika, ba vítima inséndiu ne’ebé seidauk hetan apoiu hein deit, tanba governu sei apoiu.

“Liu husi relatóriu hirak ne’ebé mak Xefi suku hato’o katak, balun seidauk hetan apoiu, hamutuk ita hein no fó hanoin nafatin ba ita-nia governu atu apoiu mós ita nia komunidade sira ne’ebé mak seidauk hetan apoiu.

Apoia mos vítima inséndiu Liquiça

Nune’e mos Parlamentu Nasionál (PN), fó apoia emerjensia hanesan, sasán ba nessesidades báziku ba vítima inséndiu iha Suku Asmanu, Postu Administrativu Liquiça Munispiu Liquiça.

Hafoin fahe sasán hirak ne’e ba vítima uma kain lima nulu resin, Prezidente Parlamentu Nasionál, Arão Noe hatete, apoiu ne’ebé PN fó ne’e, hanesan inisiativa ida nu’udar reprezentante povu nian, ne’ebé tulun povu ne’ebé afeitadu husi inséndiu refere, maibé la’os atu rekopera povu nia moris, tanba atu rezolve sitasaun ne’e kompetensia Governu nian.

Lee hotu :   Vítima inséndiu 199 husi munisípiu 4 hetan ona apoiu emerjensia

“Ami senti katak, ida ne’e todan tebes, tanba ne’e mak ami adíanta ba Governu, para bele fó asistensia ida lalais, nune’e situasaun ida ne’e hodi rezolve tiha vítima sira-nia sofrementu ne’e, tanba ahi han uma hotu, signifika sasán hotu la salva, entaun ne’e grave liu, tanba ne’e mak ami hein katak, husi uitoan ne’ebé ami iha, husi PN mai ajuda vítima sira, hodi hakmaan netik sira-nia sofrementu ida ne’e, hodi prepara fali sira-nia moris ba aban bainrua, hodi hein ajudu ne’ebé Governu  sei fó mai, oinsa bele hadia fali sira-nia uma, bele rekopera fali sira-nia sasán sira. Moris iha foho ne’e, hahan kuda dala ida para tinan ida tomak nian, se ahin han tiha ne’e katak, tinan tomak ne’e nia sei hamlaha, tanba bainhira mak nia atu kuda ba moris no fó fuan hodi han fali, sa tán agora bailoron naruk, terus ne’ebé sira hasoru ne’e todan tebes”, tenik PPN, Arão Noe ho oin triste ba jornalista sira, hafoin sorumutu ho vítima inséndiu sira, iha Suku Asmanu, Postu Administrativu Liquiça Villa, Munisípiu Liquiça, Sesta ( 22/11/2019).

Iha fatin hanesan, reprezentante vítima inséndiu, Bernardino Martins apresia ho inisiativa reprezentante povu nian, ne’ebé to’o iha baze hodi haree direita povu nia sofrementu, tanba ne’e, nia parte sujere mós ba PN, atu kontinua hatutan halerik povu nian ne’e ba ezekutivu sira, hodi nune’e, labele para de’it ho apoia ne’e, maibé presiza ajudus ne’ebé garante ba tempu naruk nian, tanba agora tempu bailoron, difisil ba vítima  sira atu buka aihán hodi sustenta moris.

“Emerjensia ne’e labele fulan ida ka semana ida rua nian de’it, ita presiza iha kálkula ida, emerjensia ne’e, presiza ba fulan hira nian, atu nune’e, sira (vítima) garante to’o hetan rekoperasaun ba sira-nia fatin ne’ebé hetan estragus, depois mak bele husik emerjensia ne’e, tanba ita haree foos saku ida, dalaruma ema ne’ebé ho família barak, bele to’o semana ida de’it hotu, entaun nia hein fali tan, tanba ne’e mak ha’u sujere, karik posivel, bele fó apoiu emerjensia ne’ebé ho modelu kontinuasaun, to’o hetan rekoperasaun ba sira nia fatin permanente, depois mak ita bele husik emerjensia ne’e, tanba sira uma ahi han, sira-nia plantasaun sira, hanesan ai-farina, batar, fehuk, talas no seluk tan, kuaze totalmente, tanba ne’e mak presiza iha ajudu emerjensia ne’e iha kontinuasaun, nune’e, bainhira to’o tempu udan, vítima nia batar isin fali karik, ita bele husik ona apoiu ne’e, atu nune’e, ita-nia povu labele ohin nia kontenti, maibé semana oin foos hotu nia halerik fali”, afirma Bernardino.

Lee hotu :   Bemo 01-012 la halo operasaun

Iha inséndiu ne’ebé akontese iha fulan Outubru tinan ne’e, iha Suku Asmanu rasik, iha populasaun Aldeia tolu mak afeitadu, no uma kuaze 20 mak mutuk hotu, no plantasaun kuaze hektares 50 resin mak estragus, inklui uma kain 30 resin mak hetan estragus tanba anin sobu, no vítima hirak ne’e, to’o agora sei okupa hela família no viziñu nia uma.ety/say

Add to Comments Here!!!!

error: Content is protected.
Secured By miniOrange
You might also like:
Veteranu Ossu la konkorda kritéria verifikasaun husi Komisaun Veteranu

Veteranu no veterana sira husi Postu...

KHUNTO preparadu ba remodelasaun

Sekretáriu Jerál Partidu Kmanek Haburas Unidade...

RSPEMD nota maioria estudante sira seidauk hatene kanta “Hino Nacional”

Responsável Seksaun Pré-Eskolar Munisipiu Díli (RSPEMD),...

Close