Kompañia Haksolok oferese mákina body disinfectant COVID-19 ba SIJK

Kompañia Haksolok Unipesoal Limitada, oferese mákina body disinfectant ba Covid 19 nian  ba Sentru Integradu Jestaun Krize (SIJK), Sabado (18/04), iha Centro Convenções Díli (CCD).

Diretór kompaña Haksolok ,Helder Vieira Aniceto,hatete mákina, body desinfectant ba covid 19, ne’e atu rega isin lolon, tanba mákina ne’e modernu no kompleta kedas ho aimoruk, ne’ebé atu rega ba isin lolon tomak, ba vizitór sira ne’ebé tama sai lor-loron, iha Sentru Integradu Jestaun Krize hodi bele,evita transmisaun surtu COVID-19.

Diretór kompaña Haksolok ne’e esplika ho apoiu ne’e nu’udar kontribuisaun no tulun ida ba Governu Timor-Leste, atu nune’e bele hamenus no halakon virus COVID-19 iha rai doben ida ne’e.

“Ami nia apoia ne’e nu’udar kontribuisaun ida hanesan sidadaun Timor oan atu nune’e ita hotu bele kontrola makas ba moras at ida ne’e ,atu lakon lalais iha Timor nune’e it abele livre husi virus corona ne’e,makina ne’e kompleta ho nia fasilidade kompostu husi aimoruk,sabaun fase liman,layar informasaun atu ema hotu bele komprende hodi ba asesu aimoruk rega isin lolon ne’e”,dehan Helder Viera Aniceto.

Iha fatin hanesan Adjuntu Operasaun ba Sentru Integradu Jestaun Krize, Calisto Gonzaga ,esplika mákina rega isin loron ho aimoruk disinfectant ne’e, atu fasilita ema hotu, hodi rega isin lolon, wainhira halo vizita ba Sentru Integradu Jestaun Krize, liu-liu ba hirak ne’ebé foin fila husi sala izolamentu.

Antes ne’e Pertamina Internasionál Timor, mós apoia ona tanke bee unidade rua, ho nia fasilidade kompletu ba Sentru Integradu Jestaun Krize.

Tuir planu Kompaña Haksolok Unipesoal Limitada mós, sei produz makina aimoruk desinfectant rega isin lolon nian halo barak,wainhira Governu liu husi ministériu sira presiza sosa hodi tau iha fatin esensiál sira.Tos