JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Família saudozu ‘Sole-Solep’ husu Governu buka tuir saudozu nia restu mortál

Família saudozu ‘Sole-Solep’ husu Governu buka tuir saudozu nia restu mortál

Família husi uma lisan Tá Ma’u Bui Solo, hamutuk ho reprezentante Sekretária Estadu Asuntu Kombatente Libertasaun Nasionál (SEAKLN), autoridade munisípiu Liquiça no autoridade lokál inaugura monumentu saudozu Felísberto Maria dos Santos ‘Sole-Solep’, nu’udár Adjuntu Polítiku Sivíl no militár rejiaun III, iha suku Lauhata, Postu Bazartete, munisípiu Liquiça.

Fámilia saudozu sente triste, tanba saudozu ‘Sole-Solep’ to’o agora nia paradeiru restu mortál seidauk hetan. Ho nune’e, parte família husu Governu liu husi SEAKLN atu buka tuir nafatin saudozu nia restu mortál.

“Esforsu família hahú kedas depois de ita ukun-an, família esforsu tiha ona buka nia fatin ne’e iha ne’ebé. Ami rasik ba to’o Baucau hodi buka informasaun no hetan mós balun ne’ebé dehan uluk hamutuk iha fatin ida naran Rumah Merah”, Reprezentante Família, Emílio Barreto, hafoin remata inaugurasaun ba monumentu saudozu Sole Solep, iha suku Lauhata, Liquiça (26-09-2020).

Emílio haktuir iha testamuña balun mak parte família identifika, maibé to’o agora buka kontaktu fali mós difísil.

“Husi família mós fó hanoin nafatin hodi servisu hamutuk ho Governu, liu-liu aman veteranu sira, oinsá servisu hamutuk atu buka restu mortál saudozu ni’an”.

Reprezentante Komisáriu Asuntu Veteranu Kombatente Libertasaun Nasionál, munisípiu Liquiça, Cesár dos Santos Silva ‘Merak’, kompromete sei koopera ho família hodi buka tuir saudozu nia restu mortál, hodi halo’ot iha Jardim dos Herois ne’ebé Governu prepara ona.

“Asuntu ida ne’e Konsellu Kombatente Libertasaun Nasionál sei buka hamutuk, tur hamutuk ho família sira atu bele buka no identifika nafatin ninia paradeiru”.

Ho nune’e, Merak apela ba jerasaun foun tenke valoriza nafatin saudozu no martír sira nia luta, tanba sira husik hela istória luta ne’ebé ema hotu sei la haluha.

“Ida ne’e mak sei sai hanesan lisan ida ne’ebé ita nia jerasaun tuan tenke haktuir nafatin istória pasadu ni’an, ba ita nia oan no jerasaun foun sira, atu banati tuir espíritu rezisténsia sira ni’an, atu nune’e bele konstroi nasaun ne’e di-di’ak”.

Saudozu Felíz Maria dos Santos ‘Sole-Solep’ moris iha Bazartete, iha loron 16, fulan Agostu, tinan 1950, oan husi aman Mau-Solo no inan Dau-Buti no saudozu oan ba da-11, husi maun-alin 12.

‘Sole Solep’ sai tropa Portugés iha tinan 1965 to’o invazaun Indonézia 1975.

Depois baze apoiu rahun iha parte Loromonu, iha tinan 1978 no iha tinan 1979, Sole-Solep hasoru malu ho responsavel kaixa klandestina iha Díli, hodi planeia prosesu klandestina.

Nune’e saudozu hala’o nia kna’ar nu’udár mós klandestina iha Liquiça, iha tinan 1979 no nu’udár mós funsionáriu saúde hodi apoiu ai-moruk ba FALINTIL sira iha ai-laran.

Saudozu promove nu’udár Adjuntu Komandante Rejiaun III Kruzeiru, husi Komandante Em Chefe Kay Rala Xanana Gusmão no mós orientasaun husi saudozu David Alex ‘Daitula’ atu organiza rede klandestina iha Díli.

Iha tinan 1997 ‘Sole-Solep’ muda ba Liquiça hodi kontinua nia servisu, hanesan klandestina no funsionáriu saúde. Nune’e iha meadu fulan Abril to’o fulan Maiu, saudozu ‘Sole Solep’ militár Indonézia idenfitika ona katak, saudozu hanesan ema klandestina.

Hahú husi ne’ebá, saudozu hetan ona torturasaun no intimidasaun oi-oin hosi tropa Indonézia sira no lori ba kastigu iha Baucau, to’o agora la hetan saudozu nia paradeiru. san

Lee hotu :   KO 25 husu povu Aileu fó informasaun ba istória rezistensia

Add to Comments Here!!!!

error: Content is protected.
Secured By miniOrange
You might also like:
MAPKOMS lansa revista loron 100

Ministru Asuntu Parlamentár no Komunikasaun Sosiál...

Ekipa MAKLN sei rekolla fotografia veteranu benefisiáriu hamutuk 20,274

Sekretáriu Estadu ba Asuntu Kombatente Libertasaun...

Xanana-Horta simu matak malirin husi Uma Lisan Mauleik Tutuluro

Sorumutu líder nasionál, Kay Rala Xanana...

Close