Vigararia Díli entrega illas Na’in Feto ba Vigararia Díli Leste no Oeste

Atu komemora ezisténsia tinan 80 Dioseze Díli, Vigararia Díli entrega illas Nossa Senhora Imaculada Conceição ba Vigararia Díli Leste no Díli Oeste, hodi halo venerasaun no hala’o prosesaun iha kada Parókia.

Prezidente Komisaun Organizadora ba selebrasaun ezisténsia tinan 80 Dioseze Díli, Padre Guilhermino da Silva, hateten, tuir loloos Dioseze Díli lori illas Na’in Feto ida de’it, hodi selebra loron importante ne’e iha kada Parókia.

Maibé, tanba evita transmisaun pandémia Corona Virus Disease 2019 (COVID-19) Vigararia Díli entrega illas Na’in Feto ba kada Vigararia ne’ebé partense ba Dioseze Díli.

“Hala’o programa ida ne’e, tanba tema selebrasaun ba festa tinan 80 nian ne’e mak ‘permariam at yesum’ ne’e duni ida ne’e hakarak atu hatudu sarani sira-nia devosaun no sarani sira-nia fiar ba Na’i Maromak”, Prezidente Komisaun Organizadora, Padre Guilhermino da Silva, hafoin remata entrega illas Na’in Feto ba Vigararia Leste, iha Lecidere-Díli, Tersa (05/10/2020).

Illas Na’in Feto ne’e rasik entrega diretamente husi Arsebispu Metropolitana Díli, Dom Virgílio do Carmo da Silva, SDB, ba Vigararia Leste, reprezenta husi Parókia Santo António Motael.

Hafoin ne’e, sarani hamutuk ho padre, madre sira, kontinua halo orasaun no prosesaun husi rezidénsia Arsebispu Metropolitana Díli, ba sentru pastorál Maria Auxiliadora Bidau Akadiru-Hun.

Entretantu Arkidioseze Díli iha Vigararia rua no mós Vigararia ne’ebé partense ba Dioseze Díli mak hanesan Vigararia husi munisípiu Aileu, Ainaro, Ermera, Same no Oe-Cusse. san