Autoridade lokál sira apresia Xanana nia asaun karitativa

Ho asaun karitativa ne’ebé Kay Rala Xanana Gusmão halo ba komunidade sira iha teritóriu Timor-Leste, Xefe suku Comoro, Eurico da Costa de Jesus, apresia ho asaun karitativa ne’ebé Xanana halo, tanba bele tulun netik komunidade sira iha situasaun COVID-19.

“Organizasaun sira barak mak ba halo ajudu umanitáriu no solidaridade  ba ema hotu, liu-liu avo Xanana, avo Xanana kuaze perkore hotu, la’ós avo Xanana de’it iha selu-seluk tan, husi Dioseze mós halo asaun iha fatin bara- barak ne’ebé ho Xanana nia atividade asaun karitativa halo ne’e, ha’u apresia, tanba bele ajuda ita-nia komunidade sira iha situasaun COVID-19  ne’ebe ohin loron akontese”, Xefe suku Comoro ne’e ba GMN iha ninia servisu fatin sede suku Comoro, Segunda (16/11/2020).

Líder autoridade lokál ne’e dehan tan, loloos ne’e asaun karidade ne’e kontrola husi parte Estadu, la’ós kontrola husi organizasaun sira.

“Portantu asaun solidaridade ne’e loloos kontrola hotu husi Governu, agora la kontrola. Agora simu tiha sasan husi avo Xanana, mai simu tan  husi Governu, ha’u simu di’ak loos, maibé ema seluk la simu liu ne’e halo nusa kuitadu”, tenik Eurico.

Nune’e mós, tuir komunidade aldeia Anin Fuik, suku Madohi, Julio da Costa nia observasaun ba asaun karitativa husi Xanana Gusmão ne’e hanesan asaun ida ne’ebé pozitivu, hodi apoiu ai-han ba komunidade sira iha situasaun krize.

“Ita hatene iha Díli ema barak mak servisu no balun mai buka moris liu husi hala’o atividade negósiu iha merkadu, depois komunidade sira iha área remota balun la servisu, tanba sira moris ho vida agrikultór de’it, entaun iha pandemia ne’e sira labele hetan osan, hodi sosa ai-han no sustenta sira-nia família, nune’e liu husi asaun karitativa Xanana nian ne’e bele ajuda ai-han ruma ba ita-nia maluk sira ne’ebé hetan difikuldade iha situasaun krize ne’e nia-laran“, tenik Xefe aldeia Anin Fuik ne’e.

Ho nune’e, Julio husu ba Governu presiza servisu hamutuk ho líder karismátiku, Kay Rala Xanana Gusmáo, para bele ajuda komunidade sira iha Timor laran tomak, iha situasaun COVID-19. car