Ladún partisipa iha loron boot, Gregório: Hamenus valor luta ba ukun rasik-an

Prezidente Komite 12 Novembru, Gregório Saldanha, konsidera, dau-daun ne’e jerasaun tuan sira ne’ebé uluk sei hirus-matan no fó sira-nia isin ba ukun rasik-an ladún partisipa ona iha loron boot sira, ho nune’e bele hamenus valor luta ninian.

“Ita-nia funu ne’e nakonu ho solidariedade nasionál no internasionál hahú husi Timor-Leste ba Jakarta, pergunta mai ita mak ne’e oras ne’e valor solidariedade, voluntarizmu, sakrifísiu no disiplina, buat sira ne’e sei iha ka la’e, ida ne’e mak ita tenke luta hodi deskobre, selebrasaun sira ne’e ema ladún iha, ezemplu halo reflesaun ba Sebastião Gomes kolega sira uluk ladún mosu hodi hamenus valor sira ne’e”, Prezidente Komite 12 Novembru ne’e liu husi konferénsia imprensa iha Centro Nacional Chega Balide-Díli, Kinta (19-11-2020), hodi hanoin hikas tinan 29 demonstrasaun primeiru ne’ebé Timor-Oan sira halo iha Jakarta-Indonézia ne’ebé hala’o.

Gregório kontinua husu ba jerasaun tuan sira, atu oinsá iha selebrasaun manifestasaun iha Jakarta ba tinan oin ou selebrasaun aniversáriu ba tinan 30, hotu-hotu tenke hamutuk sai ida de’it.

Fundadór Resistencia Nacional dos Estudantes de Timor-Leste (RENETIL), João Travolta, konsidera foinsa’e sira agora dependénsia ba osan, nune’e tenke rai-metin valor no prinsípiu luta uluk nian, hodi sira bele hatene prosesu atu hetan ukun ne’e la fásil.

“Ita selebra hanesan eventu komemorativu de’it, ita tenke hanoin alende selebra hodi relembra memoria, prinsípiu no valor ne’ebé ita komunga, maibé tenke sai momentu hodi transmite valor husi jerasaun ami nian ba jerasaun mileniál sira, Timor-Leste nia ukun-an secara estafeta transmite ba sira, sé ita la transmite ne’e sira atu kaer ukun oinsá”, tenik Travolta.

Nune’e mós membru RENETIL, Pedrito Vieira, husu ba líder sira atu fó atensaun ba dezenvolvimentu rai-laran, nune’e bele hamosu rezultadu ba ukun-an.

“Líder sira lalika gasta tempu hodi trata malu, maibé hanoin ba tinan 20 edukasaun seidauk di’ak, dezempregu barak halo ema ba hotu nasaun sira iha Europa, nune’e tenke hatudu ba Indonézia katak, dezisaun ba ukun-an ne’e hodi sai di’ak liu”, tenik Pedrito.

Membru RENETIL sira mós kontinua enkoraja juventude sira atu banati tuir jerasaun tuan nia prinsípiu voluntarizmu no solidaridade ne’ebé metin hodi kria paz no dame iha nasaun ne’e. ida