SEPS orienta ekipamentu pezadu suru rai buka mate-isin

Sekretaria Estadu Protesaun Sivíl (SEPS) sei orienta ekipamentu pezadu atu suru rai iha Aldeia moris Suku Comoro, hodi buka tuir mate-isin bebé ne’ebé to’o oras ne’e seidauk hetan. Bebé refere ho sexo mane no idade tinan rua, fulan ida.

Sekretáriu Estadu Protesaun Sivíl, Joaquim Gusmão, hatete, sei orienta makína pezadu atu suru rai iha mota-laran, hodi buka tuir bebé nia mate-isin ne’ebé to’o oras ne’e seidauk hetan.

“Ohin iha Beduku ita hatene katak, iha vítima na’in 7 mak mate no iha bebé nain ida ho tinan 2 fulan 1 to’o agora seidauk hetan, tanba ne’e ho vizita SEPS nian hamutuk ho servisu Obras Públika mobiliza makína buka tuir bebé ne’ebé lakon iha fatin ne’ebé komunidade sira identifika mate-isin seluk”,dehan SEPS, Joaquim Gusmão, ba Jornalista sira Tersa (06/05/2021), iha Comoro, Díli.

Governante ne’e haktuir, depois hetan tiha mate-isin bebé nian no família halo’ot tiha, mak hosi SEPS sei haree hodi normaliza dalan ne’ebé mota taka, nune’e komunidade sira bele liu ba-mai.

Marcos dos Santos hanesan aman hosi bebé ne’ebé lakon, husu Governu atu apoia ekipamentu nune’e bele buka lalais bebé nia isin-mate.

 “Ha’u la espera katak dezastre atu akontese, tanba momentu udan rai halai, hau nia ferik oan ho oan nain tolu 3 hela iha uma laran no hau mak iha varanda, entaun hare udan bo’ot depois rai mós monu nune’e ha’u sai ba uma kotuk hodi foti kanuru suru hela rai atu halo loos bee dalan”, Marcos konta tuir.

Nia hatutan, tuir loloos nia mate uluk tanba rai nakfera hosi foho-leten tun mai lori ho fatuk bo’ot ho rai taka, maibé lakonsege kona tanba salva-an hosi fatuk no rai ne’ebé monu, nune’e rai ho fatuk monu ba  tomak uma.

“Ha’u sente hanesan mehi tanba hakete ba kotuk haree ba uma tetuk ona, no ha’u-nia oan feto ida primeiru rai taka sa’e to’o hirus matan no ida segundu mós hanesan, maibé ha’u konsege salva hotu sira nain rua no halo ha’u la hatene ha’u-nia fén no bebé ida lakon hamutuk ho viziñu nain tolu ne’ebé iha uma mota lori ona”,dehan.Fel