KOMUNIDADE HUSU GOVERNU MONTA SEGURANSA IHA ÁREA CRISTO-REI

“Hanesan vizitante ne’ebé maka loron Domingu lori labarik sira mai iha ne’e, haree fasilidade barak ona mak hetan estragus, tanba falta kontrolu husi governu, liu-liu ministériu turísmu ne’ebé mak tau matan iha fatin turítsiku sira ne’e,” hateten Carmelito Moniz ba GMN, Domingu (10/9) iha Jardim Cristo-Rei.

Komunidade, Carmelito Moniz ne’ebé babain ho família sira iha loron domingu pasear ba iha área Cristo-Rei, husu ba governu atu monta seguransa iha fatin turístiku ne’e, atu nune’e bele asegura fasilidade públiku ne’ebé governu tau iha fatin ne’ebá.

Tanba nia dehan, fasilidade públiku balun ne’ebé governu monta iha fatin turístiku Cristo-Rei oras ne’e, agora dadaun barak mak komesa hetan estragus husi ema deskoñesidu sira no falta mós kontrolu husi governu.

Nia dehan, iha parte seluk vizitante sira ne’ebé halo vizita ba iha fatin turístiku Cristo-Rei ladun iha konsiensia ne’ebé di’ak hodi tau matan ba fasilidade públiku hirak ne’ebé governu prepara ona iha fatin ne’ebá.

“Fatin turístiku ne’e ita presiza kuidadu ho di’ak hodi bele atrai turista estranjeiru sira hodi vizita ita nia rain,” nia hatutan.

Iha fatin hanesan vizitante Ana Gomes, hateten sidadaun tenki iha konsiensia atu labele soe foer arbiru iha fatin turístiku Cristo-Rei, atu nune’e fatin ne’e bele furak ba nafatin.

“Buat ne’ebé governu presiza halo mak motiva ema atu labele soe foer arbiru iha área Cristo-Rei, liu-liu iha tasi ibun sira, tenki prepara fatin lixu ne’ebé di’ak atu ema bele tau foer ba,” hateten Ana Gomes.

Nune’e mós vizitante José Manuel mós preokupa ho beemos iha fatin ne’ebá, tanba agora dadaun bee iha área Cristo-Rei susar tebes.

“Iha área Cristo-Rei ne’e beemos susar tebes, ita husu Estadu atu tau matan ba kestaun ida ne’e. Cristo-Rei ita haree fatin turístiku ne’ebé furak tebes, maibé ita haree agora dadaun kondisaun fasilidade iha ne’e barak ladi’ak ona,”nia dehan.

Tanba ne’e komunidade sira husu ba governu foun atu hadia fasilidade ne’ebé mak oras ne’e dadaun hetan estragus no monta mós pesoal segurasan iha fatin turístiku ne’e atu bele asegura sasan ne’ebé tau iha fatin ne’ebá.ías