GJMD ho PNTL hasai vendedór sira iha Comoro

Guarda Jestaun Munisípiu Díli (GJMD), ho Polísia Nasional Timor-Leste (PNTL) Komandu Munisípiu Díli husi Unidade Task Force, hasai vendedór sira iha merkadu Comoro no rotunda Nicolau Lobato to’o Malinamuk.  

Xefe Gestaun Merkadu  Hijiene Ordem Públiku Guarda Munisípiu Díli, Berta Santa Gonçalves Veira hateten, operasaun iha fulan Jullu tinan  2019, GJMD ho PNTL konsege hasai vendedor sira iha  eis merkadu Comoro  ho rotunda Nicolau Lobato,  ne’ebé iha tempu lorokraik halo negósiu iha estrada públiku.

Tuir Berta, GJMD ho PNTL  sei kontinua hala’o operasaun konjunta ba vendedor  sira hodi bandu no duni sai husi fatin refere, tanba fa’an iha dalan protokolu nian.

“Durante ne’e sira kontinua halo operasaun pro ativa iha  Díli laran, hodi mantein ordem públiku, nune’e atu haree vendedor  sira ne’ebé laiha konsensia hodi fa’an sasan iha estrada públiku, hanesan eis merkadu Comoro nia oin, no rotunda Prezidente Nicolau Lobato to’o Malinamuk, nune’e sidade Díli ema haree moos no furak. Operasaun ne’ebé guarda jestaun munisípiu Díli halo ne’e, bazeia ba dekretu lei núneru 33/2008, iha artigu 9 to’o 11 hateten katak, bandu ema fa’an sasan iha trotoar leten, no estrada públiku, tanba antes ne’e Munisípiu Díli mós halo karta fó ona vendedor  sira ne’e, hodi kumpri desizaun Estadu nian.  Ne’eduni parte  guarda jestaun Munisípiu Díli ho PNTL kontinua hein vendedor  sira ne’e atu labele fa’an iha fatin refere”,   hatete  Berta Santa ba GMN iha nia kna’ar fatin Munisípiu Díli Sesta (05/07).

Berta haktuir,  Guarda Munisípiu Díli hala’o aktividade operasaun  durante oras 24,  bazeia ba orden públiku nian.  Ne’eduni atu kalan ou loron kontinua halo operasaun hodi haree vendedór sira  ne’ebé kontinua fa’an iha estrada públiku.aba