Nova Zelandia apoia aviaun gratuita tula estudante Timor-Oan mai TL

Bolseiru Timor-oan 35, Tersa (6/10/2020), to’o ona Timor-Leste (TL) ho Aviaun Royal New Zealand Air Force. Estudante hirak ne’e mai hamutuk ho sidadaun Nova Zelandia nain sanulu.

Aviaun Militar Nova Zelandia ne’ebé tula estudante no Nova Zelandez hirak ne’e fasilita husi Governu Nova Zelandia bazeia ba pedidu husi Governu Timor-Leste.

Diretór Jeral Konsuladu protokolu Ministériu Negósiu Estranjeiru no Kooperasaun (MNEK), Zuvencio de Jesus Martins, agradese ba Governu Nova Zelandia, tanba durante ne’e fasilita ona sira-nia aviaun, hodi tula estudante sira mai iha Timor-Leste.

“Governu Noza Zelandia sira hatudu nafatin sira-nia jenerozidade iha Timor-Leste, sira akomoda ita-nia maluk sira ne’e mai ho aviaun militar no ne’e gratuitu”, dehan Diretór Jeral Konsuladu MNEK, Zuvencio de Jesus Martins.

Embaixadór Nova Zelandia iha Timor-Leste, Philip Hewitt, hateten, ninia Governu prontu atu apoiu nafatin Governu Timor-Leste iha aspetu oi-oin.

“Governu Nova Zelandia deside suporta no ami kontinua suporta Timor-Leste”, tenik Philip Hewitt.

Pasajeiru hirak ne’e Ministériu Saúde lori kedas ba Tasi-Tolu hodi kumpre kuarentena durante loron sanulu resin haat.

Tuir planu, iha tempu badak Governu sei fasilita estudante sira husi Filipina hodi tula mos mai fali Timor. aba