Xanana Gusmão triste rona família saudozu Samba Sembilan la simu subsídiu veteranu

Kay Rala Xanana Gusmão, Sesta (06/11/2020), foti ain hodi vizita saudozu Samba Sembilan (Samba 9) nia família iha suku Ulmera, postu administrativu Bazartete, munisípiu Liquiça.

Iha vizita ne’e Xanana Gusmão sente triste bainhira rona informasaun katak, durante tinan ida resin saudozu Samba Sembilan nia família la hetan pensaun nu’udár eis gerilleiru.

“Ohin ha’u mai hasoru família Samba Sembilan, tanba ha’u rona katak iha problema kona-bá subsídiu veteranu ninian, buat ne’e a final, tuir surat ne’e sira entrega mai ha’u, Tribúnal Distrital Díli (TDD) husi prokuradoria buat sira ne’e hotu, husu tun, husu sa’e, husu hanesan fali la fiar katak, Samba ne’e veteranu ida, tanba ne’e mak ha’u koñese Samba, ha’u mai to’o iha ne’ebá mai para husu problema ne’e rejide husi saída, problema ne’e atu husu fali abilitasaun kona-bá relu,” haktuir líder nasionál ne’e.

Xanana fó sasin katak, nia parte koñese saudozu Samba Sembilan nu’udár veteranu 24 anos.

“Ha’u atu dehan de’it katak, Samba Sembilan nu’udár eroi ida, veteranu 24 anos, problema tanba atu fó ba sé, fó ba sé ne’e mak sai problema komplikadu ida ba ha’u-an rasik”, hatete Xanana Gusmão.

Líder nasionál ne’e hatutan liu tan katak, nu’udár gerilleiru durante tinan 24, Samba Sembilan nia família merese atu moris ho dignu.

Entretantu saudozu Samba Sembilan termina nia peregrinasaun iha mundu iha tinan 2019, saudozu husik hela nia kaben ho oan na’in hitu. eby