ANATL ho SEPS dada sai ona aviaun Jet hosi pista

Ekipa hosi Autoridade Nasionál Aviasaun Timor-Leste (ANATL) ho Sekretáriu Estadu Protesaun Sívil (SEPS) dada sai ona aviaun Jet privadu V-HIJL hosi pista, iha Aeroportu Internasionál Nicolau Lobato Comoro, Díli, Kuarta (13/01/2021).

Aviaun Jet privadu V-HIJL hosi Austrália ne’ebé tula pasiente COVID-19 ida obrigadu halo emergency landing iha Aeroportu Internasionál Nicolau Lobato, tanba jet ne’e avaria.

Hafoin ense tiha aftur aviaun ne’e hakarak kontinua ba Austrália, maibé roda koak bainhira atu semo, nune’e labele kontinua viajen. Ho nune’e pasiente COVID-19 ne’e izola ona iha fatin izolamentu emerjénsia Aeroportu Nicolau Lobato.

Prezidente Autoridade Nasionál Aviasaun Timor-Leste (ANATL), José Trindade da Cruz Pinto, esplika aviaun refere tula ema na’in haat kompostu husi COP pilot no pilotu, médiku ida  no pasiente ida deskonfia afeta COVID-19 husi Jakarta-Indonézia atu ba Austrália, maibé tanba aftur menus COP Pilotu no Pilotu deside aviaun landing iha Aeroportu Internasionál Nicolau Lobato, hodi ense fila-fali aftur hafoin aviaun atu semo, maibé aviaun nia roda haat parte kotuk koak hotu, COP Pilotu no pilotu deside hapara aviaun ne’e iha pista-laran durante kalan tomak.

“Horiseik ami komunika kedas ba entidade relevante hanesan saúde, parte seguransa  no Protesaun Sívil halo kedas atendimentu, ne’ebé ema ida ne’ebé mak moras ho kru sira ne’ebé afetadu COVID-19 submete ona protokolu saúde ninia liman, ami só halo atendimentu ba aviaun para dada sees tiha, atu nune’e movimentu iha aeroportu laran bele la’o normal fali”, Prezidente ANATL ne’e ba GMN iha Aeroportu Internasionál Nicolau Lobato-Díli.

Nia dehan, aviaun primeiru-vez atu semo derepente roda koak iha pista nia-laran, no ema paníku liu tan, tanba iha aviaun laran pasiente ida pozitivu COVID-19.

Alende ne’e, Sekretáriu Estadu Protensaun Sivíl (SEPS), Joaquim Gusmão dos Reis Martins, koloka mós ninia ekipa hodi apoiu ANATL, nune’e bele dada sai aviaun ne’e.

“Autoridade Protesaun Sivíl mak fó protesaun ba dezastre grave ne’ebé ita haree dau-dauk ne’e. Ne’ebé ho insidente ne’e Unidade Espesiál husi Protesaun Sivíl Bombeiros nian mai kedas hodi fó apiou ba ANATL dezde horikalan to’o dadersan, to’o ohin loron ita dada aviaun ne’e sees husi pista laran”, dehan SEPS ne’e.

Tuir planu COP Pilotu no pilotu sei troka roda foun aviaun ne’e iha Sesta semana ne’e, atu bele kontinua fali sira nia viajen ba Austrália.

Pasiente iha ona izolamentu

Sidadaun  Indonézia pozitivu COVID-19 ho  inisiál  MHM ho idade  33, izola ona iha fatin izolamentu Aeroportu Internasionál Nicolau Lobato Comoro, Díli.

Pasiente sidadaun Indonézia ne’ebé deskonfia pozitivu moras COVID-19 ne’ebé tula husi aviaun Jet Privadu ida hosi Austrália VH-ILJ, hosi Jakarta-Indonézia atu liu ba Austrália.

Tuir informasaun ne’ebé GMN hetan iha terenu katak, sidadaun ne’e nu’udar ofisiál UN-WFP iha Jakarta-Indonézia, wainhira hetan moras COVID-19, hafoin transporta ba Austrália hodi hala’o tratamentu.

Durante sidadaun estránjeiru sira kalan ida iha aeroportu hetan seguransa másimu husi Unidade Patrullamentu Fronteira (UPF), maibé observa husi dook hodi kumpre regra Organizasaun Mundiál Saúde (OMS) katak, tenke dook husi ema ida ba ema seluk, hodi halo prevensaun ba surtu COVID-19. avi