Estrada Lisbutak kotu totál afeta ba komunidade Munisípiu haat

Estrada públiku iha área Lisbutak, ligasaun kapitál Díli ba munisípiu Aileu, Ainaro, Manufahi, no Covalima kotu totál, hafoin akontese inundasaun kauza husi udan bo’ot iha Sábadu (03/04/2021) to’o Domingu (04/04/2021).

Abitante Lisbutak, Osório Gonçalves Dias,  husu ba Governu atu monta lalais moru protesaun atu nune’e bele fasilita fali komunidade ninia movimentu iha estrada nasionál ne’e.

“Akontese udan boot ne’e iha tuku rua  madrugada no mota sobu penahan ne’e iha Domingu  madrugada,  ne’ebé kalan ne’e ami labele toba ami hader de’it, tanba tauk mota ne’e mai sobu ami nia uma”,esplika abitante Lisbutak, Osório Gonçalves Dias, ba GMN Segunda (05/04/2021).

Alende ne’e,  abitante Domingos do Nascimento, husu  ba  Governu atu monta lalais moru protesaun iha Aldeia Namkari, Suku Manleu, atu bele fasilita sirkulasaun transporte.

“Ami husu ba  Governu se bele karik mai konstrui lalais moru protesaun  iha ami-nia Aldeia, tanba estrada hahú kotu ona, hodi besik ba iha komunidade nia uma”,dehan Domingos do Nascimento.

Tuir observasaun GMN iha terrenu nota katak, komunidade balun tenke la’o ain husi Aldeia Consin, Postu Laulara  Munisípiu Aileu hodi mai to’o iha área Casanafar, Postu Verra Cruz, hafoin mai mai kapitál Díli.avi