Komunidade Manufahi agradese ba Xanana nia apoiu sira

Komunidade husi Suku Grotu, Postu Administrativu Same, Munisípiu Manufahi, agradese ba apoiu materiál desportu, ne’ebé líder karismátiku Kay Rala Xanana Gusmão fó ba sira atu hasa’e sira-nia talentu iha área desportiva.

Líder karismátiku Kay Rala Xanana Gusmão, Kuarta (23/9/2020), entrega ekipamentu desportu nian hanesan bola, farda no rede ba juventude iha Suku Grotu, inklui fó mós apoiu ekipamentu ba atleta Taekwondo iha Postu Administrativu Same, Munisipiu Manufahi.

Komunidade Suku Grotu, hato’o agradesementu ba apoiu ne’ebé lider karismatiku ne’e, tanba bele motiva no fanun juventude nia talentu iha área desportu.

“Ha’u agradese tebes ba Maun Bo’ot Kay Rala Xanana Gusmão, ne’ebé mak ohin hakat mai iha Munisípiu Manufahi ne’e no ha’u reprezenta juventude Manufahi nian kongratula tebes ba maun boot Xanana no obrigadu barak”, dehan komunidade  Filipe de Araújo.

Entretantu komunidade Manufahi, Tiago Laranjeira, agradese ba líder karismátiku Kay Rala Xanana Gusmão ne’ebé nunka baruk no nunka kole hodi haleu munisípiu atu tulun nafatin povu iha moris susar ida ne’e.

“Durante tinan naruk maun bo’ot luta ona ba rai ida ne’e to’o ohin loron ami bele goza iha rai ida ne’e, no la kole, la baruk sei la’o nafatin hodi haree, ikus liu Maromak fó bensa no vida naruk para bele hala’o nafatin servisu ba povu”, hatete komunidade Tiago Laranjeira.

Komunidade mós husu ba Maromak atu hakraik vida naruk ba Xanana Gusmão hodi bele tau matan nafatin ba jerasaun foun sira. GMN