Promove artista rai-laran, Grupu Eleven Entertainment realiza konsertu amizade

Diretór Jerál Grupu Eleven Entertainment, Nelio Anbelito Gonçalves, hatete, atu promove artista sira iha rai-laran, presiza kria eventu ruma ba sira, tanba liu husi eventu refere mak ema bele koñese sira-nia kreatividade.

 “Liu husi konsertu mak atrai ita-nia juventude sira para bele hatene hadomi liu tan i valoriza liu tan ita-nia artista lokál sira, ne’ebé agora dau-daun iha talentu oi-oin, apresia liu tan sira-nia múzika, alende ita toka múzika rai seluk iha festa ka iha ne’ebé? halo nusa para ita bele toka nafatin ita-nia múzika iha festa i depois oinsa para ita bele halibur fila-fali ita nia artista señior no junior, joven sira hamutuk, ne’e para halo ita nia kualidade múzika rai-laran di’ak liu tan”, Diretór Jerál Grupu Eleven Entertainment ne’e ba GMN, Sábadu (24/10/2020), iha Liceu-Díli.

Iha fatin hanesan, Anito Matos, hateten, liu husi eventu refere bele hamosu hikas sira-nia espíritu atu bele kontinua hatudu sira-nia kreatividade, maske ho tempu ne’ebé la hanesan ona.

“Eleven Entertainment sira mai ho sira-nia objetivu ne’ebé di’ak tebes hakarak oinsa atu promove artista sira foun no mós tau hamutuk ho artista sira antigu, para depois antigu ne’e bele sai hanesan motivasaun i joven sira sai kreativu para depois sira bele hatutan ita-nia múzika Timor-Leste ne’e ba oin, sai ba ita nia múzika rasik”, dehan Anito.

Kantor señior ne’e mós husu, Governu presiza valoriza artista sira-nia kreatividade ne’ebé durante ne’e sira halo, nune’e bele motiva sira liu husi prodúz múzika no anima rona nain sira.

“Sé artista sira señior hanesan ami, ami la husu Governu atu fó subsídiu em termus materiál, maibé konsiderasaun em termus de oinsa dehan katak banda múzika ida hanesan ANAR Band, artista sira pelumenus konsiderasaun hanesan iha loron boot ne’e fó netik sertifikadu ida para hanesan rekoñesimentu ida ba ninia kontribuisaun ba nasaun liu husi múzika”, tenik Anito.

Grupu ne’e mós  informa, iha tempu badak sira sei asina akordu ho ALMAMOR hodi servisu hamutuk, atu nune’e iha fulan Dezembru, tinan ne’e, bele kria eventu boot ho naran Awards ne’ebé iha eventu refere sei fó apresiasaun ba artista no kantór Timor-Oan sira, banda, modeling, fotografer no seluk tan. Jen