Xina-TL kontinua hametin kooperasaun ba rekupera ekonomia

Embaixadór Xina ba Timor-Leste (TL), Xiao Jiangou, hatete, nia ho Prezidente Repúblika (PR), Francisco Guterres Lú Olo, koalia ona atu ba oin kontinua hametin kooperasaun entre rai rua hodi bele kombate pandemia COVID-19, inklui hodi rekupera fali ekonomia nasaun TL nian.

“Ohin (horiseik)  ha’u hasoru malu ho Prezidente Repúblika, ami iha relasaun ne’ebé amigavel,  ami koalia kona ba oinsa kontra pandemia COVID-19 no mos koalia kona ba rekuperasaun ekonomia Timor-Leste”, dehan Embaixadór Xina ba Timor-Leste, Xiao Jiangou ba jornalista sira, Tersa (14/07/2020) iha Palásiu Prezidensial Nicolau Lobato, Bairo Píte, Díli.

Xiao garante katak, Governu Xina kontinua suporta Timor-Leste atu kontra pandemia coronavirus, no ajuda Timor-Leste atu rekupera ekonomia nasional, nune’e Pezidente mos espresa ninia sentimentu diak ba Governu Xineza no populasaun Xinesa ne’ebé iha Timor-Leste.

“Ha’u mos koalia kona ba isu Hongkong kona-ba lei seguransa nasionál, kona-ba isu Hongkong no Xineza, Prezidente dehan Xineza iha poder tomak atu mantein ba isu refere, no Governu Timor-Leste kontinua suporta Xineza nia soberania no integridade”, akresenta Embaixador ne’e.

Nia subliña tan, iha asuntu ne’e nia hanoin Prezidente nia liafuan, no iha futuru ajuda Timor-Leste atu luta kontra pandemia coronavirus no rekuperasaun ekonómika, tanba durante pandemia iha Timor-Leste, realidade  Xineza halo buat barak ba Timor-Leste, hanesan médiku, Xina  mos sai hanesan nasaun primeiru ne’ebé  responde lais liu ba Timor Leste nia rekerimentu,  Exemplu Xina haruka máskara balun no mos, imagine sistema kamera  ba aeroportu, no seluk tan.

“Hahú agora ha’u hanoin Xina hanesan nasaun primeiru ne’ebé fó ona máskara rihun resin ba Timor-Leste, nune’e mos ha’u hato’o ba Prezidente ami-nia Governu kontinua halo kooperasaun atu luta kontra COVID-19, ha’u mos  apresia ba Governu Timor-Leste nia servisu luta COVID-19, tamba la iha tan kazu foun iha Timor-Leste, ha’u espera Timor-Leste livre husi pandemia coronavirus”, tenik Xiao Jiangou. Oly