OJE 2021 GPM prevé tokon USD 10.4

Xefe Gabinete Primeiru Ministru (GPM), Azevedo da Costa Marçal, informa, GPM prevé Orsamentu Jerál Estadu (OJE) tinan 2021 ho montante USD tokon 10.4, hodi ezekuta planu prioridade haat.

“OJE 2021 ne’ebé GPM prevé tokon USD 10.4 ne’e ita iha programa prinsipál haat, ida kontinua reforsa ita-nia reforma estratéjika Estadu nian, fó apoiu ba Gabinete Apoiu Sosiedade Sivíl, unidade planeamentu monitorizasaun no Unidade Planeiamentu, Monitorizasaun no Avaliasaun (UPMA), Sentru Integradu Jestaun Krize (SIJK) no atividade internál”, Xefe GPM ne’e iha Palásiu Governu, Kinta (19/11/2020).

Azevedo esplika, ida seluk programa apoiu sosiedade sivíl, apoiu ida ne’e iha porsaun orsamentu boot ba apoiu sosiedade sivíl ho orsamentu USD tokon 6 resin, ne’e inklui mós programa apoiu ba finansiamentu organizasaun rezisténsia, konfisaun relizioja, no mós apoiu ba instituisaun ne’ebé iha terenu halo auditóriu sosiál.

“Orsamentu lubuk ida mak ita prevé ba programa ne’e, tanba ita hakarak papél sosiedade sivíl ne’e forsa, la’ós ita fó osan hodi kontrola sira-nia opiniaun ne’e la’e, duke sosiedade sivíl husi rai-liur mak mai, di’ak liu ita promove sosiedade sivíl rai-laran”, tenik Xefe GPM ne’e.

Nia hatutan, tinan ida ne’e apoiu GPM la’ós de’it ba relijiaun Katólika, maibé apoiu mós ba relijiaun sira seluk nia atividade.

Azevedo subliña liu tan, GPM mós fó apoiu ba UPMA ne’ebé fó apoiu ba ministériu hotu, tanba sira halo servisu barak liga ho orsamentu bazeia ba programa, planu asaun anuál kada ministériu, UPMA mak fasilita kolabora ho Ministériu Finansa (MF).

“Tuir polítika Governu nian ita sei ajusta fila-fali planu no ba oin GPM konsentra asaun anuál sei transfere ba MF mak halo no planu longu prazu Gabinete Vise PM, José Reis no programa ikus liu, reforsa boa governasaun internál”, relata Xefe GPM ne’e. cin