PN ladauk simu relatóriu ezekusaun OJE 2020

Reprezentante povu iha uma fukun Parlamentu Nasionál (PN) ladauk simu rezultadu ezekusaun Orsamentu Jerál Estadu (OJE) tinan 2020 husi VIII Governu.

“Ha’u hanoin OJE 2020 ne’e buat todan, durante ne’e ita ezekuta ho Dotasaun Orsamentu Temporáriu (DOT) hafoin PN aprova OJE, orsamentu sira ne’e halo diminuisaun direta ba orsamentu ne’ebé mak Governu gasta iha tinan ida nia-laran, maibé ami nafatin iha kompeténsia atu tuir“, Prezidente komisaun C iha PN, Maria Angélica dos Reis ba jornalista sira iha Parlamentu Nasionál (PN), Sesta (27-11-2020).

Deputada bankada FRETILIN ne’e hateten, hafoin PN aprova OJE 2020 espera Tribunal das Contas lori relatóriu ezekusaun OJE 2020 mai iha PN, atu nune’e halo debate ba Konta Jerál Estadu tinan 2020.

“Ita atu haree sira-nia kapasidade ezekusaun ne’e to’o iha ne’ebé mak haruka, to’o oras ne’e PN seidauk simu rezultadu ezekusaun OJE 2020, naturalmente sei iha tinan rua tiha lai, tanba Tribunal das Contas halo auditoria kontas sira ne’e, auditada hotu mak foin haruka mai PN atu halo apresiasaun polítika iha PN”, tenik Maria Angélica.

PN aprova OJE 2020, iha loron 8, fulan Outubru, tinan ne’e, ho montante USD billiaun 1.497,1 no ho votus a favor 43, kontra 21 no abstensaun 1. ety