PN sei debate OJE 2021 iha fim Novembru

Sekretária meza Parlamentu Nasionál (PN), Lídia Norberta, informa, PN sei hahú debate proposta lei Orsamentu Jerál Estadu (OJE) tinan 2021 iha loron 30, fulan Novembru no sei remata iha loron 15, fulan Dezembru tinan ne’e.

“Ita boot sira hatene semana kotuk komisaun sira iha PN finaliza ona audíensia públika ho ministériu sira, semana ne’e komisaun sira hotu foku hela ba sira-nia elaborasaun ba iha relatóriu pareser, husi komisaun sira ne’e komisaun A finaliza ona relatóriu pareser no submete ona ba komisaun C. Bazeia ba rezultadu reuniaun líder bankada iha Kinta, loron 19, fulan ne’e, deside kalendáriu debate proposta OJE 2021 ne’ebé sei hahú debate iha loron 30, fulan Novembru”, Sekretária meza PN ne’e liu husi konferénsia imprensa iha PN, Sesta (20-11-2020).

Tuir Lídia, maske loron 7, fulan Dezembru, konsidera hanesan feriadu nasionál, maibé PN sei kontinua debate, atu nune’e bele finaliza tuir kalendáriu ne’ebé determinadu ona.

“Maske loron 7, fulan Dezembru, loron invazaun ne’ebé monu iha loron Sábadu, loron 5 no loron 12, fulan Dezembru no PN sei iha posibilidade diskusaun OJE kontinua debate, hodi finaliza debate OJE iha loron 15, fulan Dezembru, tinan ne’e”, tenik Sekretária meza PN ne’e.

Entretantu Governu submete proposta lei OJE tinan 2021 ba PN, iha loron 15, fulan Outubru, hamutuk USD billiaun 1.895, kompostu husi saláriu vensimentu USD millaun 239,26, bens servisu USD millaun 421,49, transferénsia públika USD millaun 669,91, kapitál menor 61,14, kapitál dezenvolvimentu USD millaun 503,20. ety