Konfrontu iha Beto, rezulta joven ida mate ■Detein suspeitu na’in 4

Konfrontasaun entre  juventude sira iha  Beto, rezulta joven ida  ho naran Adelino  de Jesus  Barreto  mate, tanba hetan sona iha isin parte kotuk laran hodi borus to’o hirus matan.

Kazu ne’e akontese iha Beto, Suku Madohi, Postu Administrativu Dom Aleixo, Munísipiu Díli, Domingu (24/12/12). Iha akontesimentu ne’e Polísia Nasionál Timor Leste (PNTL) kaptura suspeitu na’in ha’at (4),  hodi ba detein iha sela detensaun PNTL  Munisípiu Díli hodi  submete ba Tribunal Distrital  Díli.

Suspeitu nain ha’at ne’e ho inisial  JS, OD, OB no suspeitu AS deskonfia autor prinsipal sona mate Adelino de Jesus Barreto.

Mate isin iha  ona mortuariu  Hospital Nacional Guido Valadares (HNGV)  hodi submete ba prosesu autopsia.

“Kazu akontesimentu iha Beto ne’e konsidera omisídio, tanba  vítima  iha HNGV mate ona, vítima mak  Adelino de Jesus Barreto,  prosesu liga ba kazu ne’e la’o nafatin. Tanba ne’e suspeitu  ne’ebé hamate alin Adelino de Jesus Barreto, PNTL kaptura tiha ona nain ha’at, dadauk ne’e detein ona iha sela”,esplika Segundu Komandante PNTL Munisípiu Díli  Superintendente Assistente Euclides Belo, ba jornalista sira (24/12/18) iha Kuartel PNTL Díli.

Kona-ba kronolojia husi akontesimentu ne’e, Euclides Belo, seidauk esplika ba públiku, tanba  Polísia Munisípiu Díli sei  hala’o hela auto de partisipasaun ba Ministériu Públik.

Alende ne’e iha akontesimentu ne’e mos motor  ne’ebé mak kondus husi vítima Adelino de Jesus Barreto hetan  estragus husi suspeitu sira, no kadeira komunidade nian   balun rahún.

Entretantu matebian Adelino de Jesus Barreto Moris iha aldeia Olo-olo,  Suku Lour,  Postu Administrativu Bobonaro, Munisípiu Bobonaro, iha loron 14, fulan Setembru, tinan 1994.avi