Ema tuda Igreja Balide, Madre ida kanek ■PNTL detein suspeitu na’in haat

Ema kriminozu sira tuda Igreja Balide, iha Sabadu (20/04/19), mais ou menus tuku 12 kalan oras Timor-Leste, wainhira sarani Katólika liu-liu  sarani Parókia Balide selebra hela  misa aleluia Jesus Cristo nia moris hias, hodi rezulta  madre Canosiana Arminda ain naksalak no akulitus ida kanek.

Iha akontesimentu ne’e PNTL konsege kaptura  joven na’in ha’at  ne’ebé mak Polísia Nasionál Timor-Leste (PNTL) Eskuadra Nain-Feto suspeita ba akontesimentu ne’e.

“Horikalan (Sabadu 20/4/19) akontesimentu kiikoan ida, joven sira  balun hemu lanu hamriik iha estrada parte liman karuk  mak tuda tama  mai Igreja,  ne’ebé halo sarani sira hakfodak halai tama iha Igreja laran, no balun halai namkari, ema balun ain kanek, balun dezmaia, inklui mós Madre Canosiana Arminda ain naksalak, tanba  fó dadauk komiñaun ba sarani sira, depois PNTL kaptura kedas joven ida iha fatin”,esplika Padre Pároko Balide Graciano Santos Barros, ba jornalista sira Domingu (21/04/19), iha Igreja Balide Díli.

Ho akontesimentu ne’e,  Padre lamenta tebes. Padre Graciano Santos Barros dehan,  tuir lolos Polísia hasaé volume de seguransa iha Igreja refere.

“Ha’u lamenta  oituan  tanba selebrasaun  bo’ot hanesan ne’e só lolos   ita nia parte seguransa halo possível halo nia  seguransa, tanba ema barak la halimar, sé horikalan mak bomba ruma nakfera karik  entaun ema barak mak mate”,lamenta Padre Graciano Santos Barros.

Alende  ne’e  Komandante PNTL Munisípiu Díli Interino Superintendente Asistente  Euclides Belo, konsidera asaun  ne’ebé mak komete  husi joven sira seriu tebes. Tanba tuir Euclides Belo, durante  iha Timor nunka akontese ema tuda Igreja.Tanba PNTL la tolera hahalok sira ne’e.

“Tanba  ne’e mak iha PNTL nia liman ita suspeita ema  nain hat,   nain ida horikalan (horseik kalan) ita detein, nain tolu ohin Domingu (21/04/19) autoridade lokal sira fó hatene,  ita nia servisu intelejen Polísia  nian  mós la’o, i nune’e mós komunidade sira nudar sarani fó informasaun ba Polísia, hodi aruma sira.  Husi suspeitu nain hat  ne’ebé mak ita suspeita hela ne’e, priode aguarda iha Komando PNTL Díli  12 de tempu, mas la taka dalan bele agora bele ora-oras tan vitima sira fó informasaun ba Polísia  rekejitus atu bele muda sira nain hat ninia estatutu, sai hanesan detidu karik prosesu la’o hela”,dehan Euclides Belo.

Enkuantu ba  suspeitu ida Polísia kaptura ho inisial Delta-Delta Romeo.

“Pesoal  ne’ebé mak ami kaer horikalan nia mós hetan kanek, tanba momentu ne’ebá nia hatais kalsa badak ne’ebé  Polísia ho komunidade sira hare’e, entre grupu sira ne’e, ida mak suspeitu Delta-Delta Romeo, entaun ita kaptura nia, ita halo identifikasaun ba nia isin lolon hetan mós dokumentus balun no atributu balun liga artemarsiais nian”,dehan Euclides Belo.avi