Kondus kareta Estadu laiha karta kondusaun, PNTL detein morista na’in 7 iha sela

Polísia Nasionál Timor-Leste (PNTL), detein  motorista nain hitu iha sela Polísia detensaun Munisípiu Díli, tanba kondus transporte Estadu, laiha karta kondusaun.

Operasaun konjunta entre PNTL, Komisaun Anti Korrupsaun, Dirésaun Nasionál Transporte Terrestre, Diresaun Nasionál Seguransa Rodoviária,  iha Domingu (02/06/19)  komesa iha tuku 03 loraik to’o 5 loraik oras Timor-Leste.

Akvidade pasa revista ne’e, iha Manleu estrada Foun, Tasitolu, Mandarin, Lesidere, no Kuluhun.

Husi rezultadu operasaun  ekipa konjunta,  konsege prende kareta Estadu  iha  6  no motorizada 22 no detein motorista nain hitu iha sela detensaun Polísia nian,  tanba komete infrasaun laiha karta kondusaun.

Hafoin prende tiha  kareta ho motor hirak ne’e lori  mai para hamutuk ho Patrimonia Estadu hodi halo prosesu investigasaun.

“Sira nain hitu, mak ami   detein durante oras hitu nulu resin rua, iha sela detensaun  Polísia nian, hafoin lori ba Tribunal Distrital Díli,  hodi tuir primeiru interogatóriu”,esplika  Adjuntu KomandanteTránzitu Nasionál Inspetór  Matias da Silva, ba iha Patrimonia Estadu Balide Díli, hafoin pasarevista.

Enkuantu kareta sira mak  involve  iha infrasaun sei aplika multa.

Alende  ne’e Diretór  Jerál  Investigasaun KAK,  Augostu da Costa Castro hateten, operasaun konjunta ne’e ho tipu ketak-ketak,  husi parte KAK nian, hare’e ba ema ida kondus kareta ho motorizada funsionariu Estadu ka lae, objetivu saida.

 “Kareta Estadu  ne’ebé mak bele serkula iha loron Sábadu no Domingu, bainhira iha lisensa husi ninia superior ou kareta sira utulizasaun husi Polísisa, Bombeiros, husi dotor sira servisu ba saúde ninian,  husi parte Ambulansia, Prokuradór, Defensór Públiku, sira ne’e mak bele iha dereitu ba serkula, mas ba  instituisaun sira seluk lori kareta Estadu serkula sein autorizasaun livre Tránzitu entaun ida ne’e ami ténki prosesa”,dehan Augostu da Costa Castro.

Alende ne’e, tuir observasaun GMN nota katak,  kareta Estadu balun tula família, no tula   hudi iha kareta laran.avi