2020, Komando F-FDTL sei rekruta ema 600 tama militar

Komando Falintil Forsa Defeza Timor-Leste (F-FDTL), sei rekruta  ema sivíl hamutuk 600 iha tinan 2020,  hodi tama  ba  militar.

Husi ema 600 ne’e inklui joven feto no mane sira, ne’ebé mak interese atu bele tama iha forsa armada.

“Tama ona ba planu, iha tinan 2020 tenki halo rekrutamentu ba membru F-FDTL foun,  porque iha situasaun  krítiku liu  mak situasaun pessoal. Situasaun pessoal agora ne’e kuaze ema graduadu mak barak soldadu  fraku.  Ita prepara tiha Sarjentu laiha ema atu nia komanda, nia bele prosesa fali komando, entaun   ha’u prepara  forsa nusa mak ha’u ba fali seguransa. Ne’e sala la’os ami komando, maibe  sala ne’e desizaun polítika. Ne’ebé  iha tinan barak  ita la halo rekrutamentu, tan ne’e hakarak ka lakohi tinan 2020 ita  halo rekrutamentu. Iha fulan Outobru ne’e halo ona preparasaun ona”,esplika reprezentante Xefe Estadu Maior Jeneral Forsa Armada Brigadeiru Jeneral Falur  Rate Laek, ba jornalista sira Kinta (12/09/19) iha Komponente Formasaun Treinu F-FDTL iha  Metinaro.

Tuir planu membru F-FDTL ne’ebé mak sei rekruta koloka iha komponente Formasaun Treinu F-FDTL Komponente Apoiu Servisu, Komponente Naval, Komponente Terrestre no Unidade Polísia Militar.avi