JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kazu Gastão de Sousa, TDD altera ba krime pekulatu seña

Kazu Gastão de Sousa, TDD altera ba krime pekulatu seña

Tribunál Distritál Díli (TDD), iha Segunda, loron 13, fulan ne’e, halo rejulgamentu ba kazu krime pekulatu, kazu administrasaun da noza ne’ebé deskonfia komete husi arguidu Gastão de Sousa, Diogo da Costa, Jordão da Silva Sousa, Ferli Afonso da Silva Sousa no Padre Martinho Gusmão.

Antes ne’e, iha leitura akordaun primeiru julgamentu tribunál aplika pena prizaun efetivu fulan nen (6) no suspende ba fulan nen (6) ba arguidu Gastão de Sousa no arguidu Diogo da Costa, tanba faktu ne’ebé prodúz iha julgamentu provadu.

Enkuantu arguidu Jordão da Silva Sousa, Ferlio Afonso da Silva Sousa no Padre Martinho Gusmão, tribunál absolve husi krime ne’ebé Ministériu Públiku (MP) imputa ba sira, tanba konsidera laiha faktu ne’ebé provadu.

Iha rejulgamentu ba kazu ne’e, Defensór Públiku (DP), Estaqui Guterres konfirma katak, parte defeza ho MP halo rekursu ba tribunál rekursu husu rejulgamentu, tanba konsidera desizaun TDD la justu, nune’e Tribunal Rekursu (TR) deside halo rejulgamentu, hodi haree fila-fali faktu balun ne’ebé deskreve ona iha akuzasaun laran.

Estaqui afirma, iha prosesu rejulgamentu ne’e tribunál konsege halo alterasaun husi krime pekulatu de uzu veíkulu ba fali pekulatu seña, tanba tuir tribunál nia intendimentu katak, arguidu sira uza kombustivel ne’e ba interese privadu.

Maibé defeza ne’e konsidera desizaun tribunál primeira instánsia nian la justu, tanba arguidu Gastão de Sousa nu’udár eis Ministru Obras Públika (MOP) no Diogo da Costa hanesan Xefe Gabinete iha altura ne’ebá no uza ninia veíkulu privadu no nia uza kombustivel mak Estadu nian ba servisu públiku, la’ós ba servisu privadu.

“Pena suspensaun ba iha arguidu Gastão de Sousa, inklui mós arguidu Diogo, ba arguidu Martinho inklui arguidu Ferli no arguidu Jordão tribunál konsidera katak faktu sira ne’e la provadu, entaun absolve arguidu sira hanesan mós desizaun ohin ne’e pensa suspensaun ba arguidu Diogo no arguidu Gastão, pena prizaun efetivu mak 6 meses, suspende ba periodikamente hanesan. Tribunál ohin halo alterasaun, primeiru dehan katak pekulatu, pekulatu ne’e krime kuaze hanesan, mezmu pekulatu uza veíkulu no pekulatu uza mina kuaze pekulatu hotu, maibé ohin sira halo alterasaun de’it katak pekulatu de uzu veíkulu ne’e laiha prova ida, maibé pekulatu uza mina ne’e dehan iha prova ne’ebé hatudu, maibé krime ne’e hanesan de’it”, informa DP ne’e.

Lee hotu :   Advogadu Indonézia garante sei laiha pena de morte ba kazál Timor-oan

Nia konsidera, desizaun tribunál ne’e laiha mudansa, tanba mantein nafatin desizaun anterior ni’an, tanba ne’e, parte defeza la konkorda no sei halo rekursu ba TR durante loron 15.

Tuir akuzasaun ne’ebé iha katak, iha loron 28, fulan Fevereiru, tinan 2010, Governu RDTL asina akordu ho Asia Development Bank (ADB) hodi hala’o projetu finansiamentu ho montante orsamentu hamutuk USD 46.000.000. Projetu ne’e atribui ba fundu reablitasaun no konstrusaun estrada Liquiça no Batugade.

Projetu refere remata iha tinan 2012 no tenke entrega fila-fali osan ne’ebé la utiliza ho montante USD82.776,77, inklui viatura ualu (8).

Entre viatura hirak ne’e, Ministériu Obras Públika (MOP) simu viatura rua, ho xapa matrikula 18-948 TLS ho marka Toyota Land Cruiser no viatura ho xapa matríkula 19-754 TLS ho marka Toyota Kijang Inova no entrega ba arguidu Diogo da Costa nu’udár Xefe Gabinete iha MOP.

Maibé realidade fó koñesementu de’it ba viatura rua seluk ho xapa matríkula 18-723 TLS ho marka Toyota Rav 4 no viatura ho xapa martíkula 18-947 TLS ho marka Toyota Land Cruiser Prado.

Hafoin simu viatura hirak ne’e, tuir instrusaun verbál husi arguidu Gastão de Sousa, la fó koñesimentu ba Departementu Lojístika iha MOP kona-bá simu viatura hirak ne’e.

Konkordánsia no kolaborasaun hirak ne’e ho intensaun oinsa bele halakon rejistu viatura rua ne’e, hanesan partimóniu Estadu ni’an.

Iha loron 24, fulan Setembru, tinan 2012, arguidu Gastão de Sousa komunika ba ADB kona-bá ninia desizaun atu atribui viatura rua ho xapa martikula 18-948 no 19-754 ba Unidade Jestaun Projetu ni’an, inklui manutensaun no abastesimentu kombustivel ne’ebé finansia husi ADB, maibé realidade mak viatura ho xapa martikula 18-948 rai hela iha arguidu Gastão de Sousa ninia rezidénsia iha aldeia Becussse Kraik, suku Bekora, munisípiu Díli.

Lee hotu :   Deolindo dos Santos : Tempo badak TR fó sai rezultadu reklamasaun FRETILIN

Arguidu Gastão de Sousa mós permite nia oan nain rua hanesan arguidu Jordão Maria de Jesus Sousa no Ferlio Afonso Badoloi Sousa, utiliza veíkulu refere ba títulu privadu no falsifika motorista nia asinatura hodi ense mina iha Tiger Fuel no uza paseiu iha sidade Díli laran.

Arguidu Gastão de Sousa mós permite arguidu Diogo da Costa halo manutensaun dala rua ba kareta ho xapa matrikula 18-948 uza osan ADB ni’an.

Iha data ne’ebé la apura iha fulan Maiu, tinan 2014, arguidu Martinho Gusmão hato’o pedidu verbalmente ba arguidu Gastão de Sousa hodi husu ajuda viatura ida ba preparasaun serimónia komemorasaun tinan 200 parokia Manatuto iha loron 13, fulan Maiu, tinan 2014.

Arguidu Gastão de Sousa entrega pesoalmente viatura ho xapa martikula 19-754 TLS ne’ebé uza hela ba títulu privadu husi arguidu Diogo da Costa.

Arguidu Martinho Gusmão utiliza viatura refere durante tinan 1 fulan 3 no bainhira uza viatura refere, arguidu Martinho Gusmão husu dala rua ba arguidu Gastão de Sousa hodi halo manutensaun ba viatura ne’e ho fundu husi ADB ho montante USD532.34.

Bazeia ba akuzasaun hirak ne’ebé iha, konsidera katak bens no ekipamentu hirak ne’e uza partensia ba Estadu, mezmu nune’e arguidu sira aproveita patrimóniu públiku ba benefísiu privadu maske hatene katak aktu sira ne’e prejudika Estadu.

Prokuradór akuza arguidu Gastão de Sousa kontra artigu 295 Kódigu Penál kona-bá pekulatu ho moldura penál tinan 3 to’o tinan 10 no nu’udár ko-autór material artigu 274 Kódigu Penál kona-bá krime administrasaun da noza.

Arguidu Diogo da Costa, Prokuradór akuza kontra artigu 295 Kódigu Penál kona-bá pekulatu no kontra krime pekulatu de uzu (artigu 296) no kontra artigu 303 (a) Kódigu Penál kona-bá falsifikasaun ba dokumentu ka notasaun téknika.

Lee hotu :   Operasaun ba GAM, Governu estabelese ekipa Task Force

Entretantu ba arguidu Martinho Gusmão, Prokuradór akuza nu’udár kumplise ba krime administrasaun da noza (artigu 274 Kódigu Penál).

Arguidu Jordão Maria de Jesus Sousa no Ferlio Afonso Badoloi Sousa, Prokuradór akuza nu’udár ko-autór ba krime pekulatu (artigu 295).

Audénsia ba julgamentu ne’e prezide husi Juíz Koletivu, Albertina Neves, António Helder no Jumiati Freitas, MP reprezenta husi Prokuradór, Jacinto Babo no Rogério Viegas, arguidu sira hetan asisténsia legál husi Defensór Públiku, Estaqui Guterres, Fernando Carvalho no Henrique Maríz. san

Add to Comments Here!!!!

error: Content is protected.
Secured By miniOrange
You might also like:
PN preokupa postu Laga laiha kareta ambulánsia

Parlamentu Nasionál (PN) preokupa ho komunidade...

Fasilita patrullamentu marítima, FRETILIN husu Governu hadi’a ró Kay Rala

Reprezentante povu iha uma fukun Parlamentu...

Lere husu Polísia Militar hatudu disiplina

Xefe Estadu Maiór FALINTIL-Forsa Defeza Timor-Leste...

Close