SIK detein eis prezidente Komisaun Funsaun Públika

Polísia Nasionál Timor-Leste (PNTL), liu husi Servisu Investigasaun Kriminál (SIK), Kuarta (02/12) detein ona eis Prezidente Komisaun Funsaun Públika (KFP) ho inisial LP iha ninia kna’ar fatin Ministériu Negósiu Estranjeiru no Kooperasaun (MNEK).

Detensaun ne’e halo iha tuku 09:00 dadersan bazeia ba mandadu Tribunál Distritál Díli (TDD) ho númeru NUC0077/17. Suspeitu ho inisiál LP deskonfia komete krime partisipasaun ekonómika iha negósiu ne’ebé previstu iha Kódigu Penál Timor-Leste artigu 229, bainhira asume kna’ar nu’udár Prezidente KFP. Hafoin detensaun PNSIK kontinua halo investigasaun ba suspeitu iha edifísiu SIK, Caicoli, Díli, depois sei submete ba prosessu primeiru interogatóriu iha TDD.

Prezumivel autór ho inisisal LP asume kna’ar nu’udár Prezidente KFP iha tinan 2014 to’o tinan 2015 hafoin troka husi atuál Prezidente KFP, Faustinho Cardoso.

Maibé antes simu kargu Prezidente KFP, LP, hakna’ar-an hanesan Diretór Jerál Sekretariadu ba Estabelesimentu KFP. Hafoin termina nia mandatu nu’udár Prezidente KFP iha tinan 2017, LP asume fali kna’ar iha Ministériu Negósiu Estranjeiru no Kooperasaun (MNEK) nu’udár Diretór Ajente Jerál Kooperasaun Timor-Leste to’o ohin loron. oct