Aluc Descartes: Posibilidade reativa SIJK

Diretór Sentru Integradu Jestaun Krize (SIJK), Brigadeiru Jenerál, João Miranda “Aluc Descartes”, hateten, iha posibilidade SIJK reativa fali, maibé depende situasaun evolusaun COVID-19.

“SIJK ne’e posibilidade iha, depende ba evolusaun situasaun moras ida ne’e mak determina, husu atu ita reativa fali ekipa sira ne’ebé kompoin iha SIJK, kuandu ita haree katak moras ne’e lokalmente iha ona transmisaun ida ne’e indubitavelmente ita kria ona situasaun servisu”, Brigadeiru Jenerál ne’e ba jornalista sira hafoin halo sorumutu ho Primeiru Ministru (PM), Taur Matan Ruak, iha Palásiu Governu, Segunda (25-01-2021).

Iha enkontru ho PM ne’e Diretór SIJK mós rekomenda ba Governu atu foti medida ne’ebé rigorozu liu hasoru sidadaun sira ne’ebé kontinua hakat fronteira ilegalmente, tanba fó risku ba sidadaun seluk nia moris.

“Rekomendasaun ne’ebé fó mak iha nesesidade foti medida ne’ebé duro to’os liu, tanba sira toman ona kuandu klandestinamente sira tama medidas ita foti, ba tau kuarentena depois 14 dias fila ba uma no ha’u rekomenda Estadu tenke to’o uitoan evita situasaun sira ne’e, ha’u rekomenda sira tenke iha sansaun ou kastigu no alimentasaun ne’e sira mak tenke selu rasik”, tenik Aluc Descartes.

Nia subliña mós katak, medida balun ne’ebé Governu foti hodi hametin seguransa iha fronteira ladún efisiente, tanba númeru pesoál seguransa la sufisiente ba fronteira ne’ebé luan tebes.

Entretantu situasaun ida ne’ebé bele rezolve COVID-19 iha Timor-Leste mak ema hotu iha konsiénsia hodi fó apoiu, liu-liu kumpre regra Estadu Emerjénsia (EE), tanba haree ba kondisaun nasaun viziñu fó risku maka’as ba sidadaun rai-laran. ida