KE-KSDS apoia PR dekreta EE dasanulu

Prezidente Repúblika (PR), Francisco Guterres “Lú Olo”, Tersa (26/01/2021), konvoka reuniaun ho Konsellu Estadu no Konsellu Superiór Defeza no Seguransa (KSDS), hodi diskute pedidu Governu ba estensaun Estadu Emerjénsia (EE) ba dasanulu. Iha reuniaun ne’e membru hosi Konsellu rua ne’e fó apoiu ba desizaun Xefe Estadu atu dekreta tan EE ba dasanulu.

Asesór Polítiku PR, Gregório Sousa, hateten, Prezidénsia Repúblika sei haruka pedidu ne’e ba Parlamentu Nasionál (PN). PN halo sira-nia konferénsia líder bankada, para ajenda ba debate renovasaun EE.

“Sé sira aprova duni, klaru katak sira sei haruka fali mai PR para promulga no depois Prezidente halo dekretu renovasaun tenke halo publikasaun ho efeitu loron 2, Fevereiru kalan. Maluk sira hatene agora medida ba implementasaun EE ne’e Governu mak sei deside, depois de Parlamentu aprova tiha EE, Governu sei halo implementasaun, sei halo nafatin hanesan EE agora ne’e ka aumenta ba tan nia restrisaun sira ka lae? ne’e kompeténsia Governu nian. Maluk sira bele hein to’o Kinta Feira nune’e iha ona medidas”, Asesór Polítiku PR ne’e ba jornalista sira iha Palaçio Presidencial Nicolau Lobato, Bairro Pite-Díli.

Gregório akresenta, Primeiru Ministru, Taur Matan Ruak, oras ne’e preokupa loos, tamba situasaun ida agora bele sai mós grave. Tanba haree mós ba situasaun COVID-19 iha provínsia Nusa Tenggara Timur (NTT)-Indonézia agrava demais ona. Entaun sira hotu entende katak EE nesesáriu duni.

Entretantu EE dasia ne’ebé mak agora vigora hela sei remata iha loron 1, fulan Fevereiru, tinan 2021. oct