TR altera medida koasaun ne’ebé aplika ba eis Prezidente KFP

Tribunál Rekursu (TR) liu hosi despaixu iha loron 21, fulan Janeiru ne’e, altera ona desizaun Tribunál Primeira Instánsia ne’ebé aplika medida koasaun Proibisaun Auzénsia ba asistidu ho inisiál LP, nu’udar eis Prezidente Komisaun Funsaun Públika (KFP).

Defensór Públiku (DP), Sérgio Quintas, hateten, tuir intendimentu TR ba desizaun Tribunál Primeira Instánsia iha faze prosesu Primeiru Interogatóriu (PI), la tuir konteúdu balun husi artigu 183, konjuga ho artigu 193 Kódigu Prosesu Penál, tanba juíz prosesu iha nia desizaun PI la tau indísiu forte.

Nune’e, TR ordena fali Tribunál Primeira Instánsia hodi husu Ministériu Públiku (MP) atu devolve fali arguidu nia pasaporte, ne’ebé antes ne’e tribunál hasa’i no mós la aplika tan medida koasaun ruma ba arguidu.

“Liu hosi DP halo rekursu ba TR. TR hasa’i nia despaixu iha 21 de Janeiro 2021, hodi altera medida koasaun ne’ebé tribunál rekoridu aplika. Tanba juíz husi Tribunál Distritál Díli la tau kestaun kona-bá indísiu forte, maibé tau de’it indísiu, kuandu ita aplika medida koasaun ne’ebé mais forte tenke haree kestaun ida ne’e, tanba sé tau de’it liafuan indísiu de’it ne’e signifika katak arguidu la komete krime ruma”, DP ne’e ba GMN iha TDD, Segunda (25/01/2021).

Defeza ne’e akresenta, iha despaixu ne’e mós MP tenke komunika ho autoridade ne’ebé emite pasaporte, autoridade servisu fronteira no Ministériu Negósiu Estranjeiru no Kooperasaun (MNEK), nune’e arguidu livre hodi halo movimentu.

Antes ne’e, iha desizaun PI, Tribunál Distritál Díli aplika medida koasaun proibisaun auzénsia ba eis Prezidente KFP, tanba deskonfia arguidu envolve ho kazu balun wainhira sei asume kargu refere. san