Mari Alkatiri: FRETILIN lakohi iha tan eleisaun antesipada

Sekretáriu Jerál Partidu Frente Revolucionário Timor-Leste Independente (FRETILIN),  Marí Alkatiri, hateten, FRETILIN lakohi mosu tan ona eleisaun antesipada hanesan iha tinan 2017 liu ba, atu nune’e governu ne’ebé ukun tenki to’o tinan lima.

“Ami lakohi eleisaun antisipada, se mak ukun, ukun aat ka diak to’o fin, para nia ukun aat ne’e para tun rai kuak”,deklara Marí Alkatiri ba jornalista hafoin hala’o Konferesensia FRETILIN ba datoluk iha City 8 Canosa, Has Laran, Sábadu (21/09/2019).

Marí Alkatiri esplika katak, konferensia ida ne’e prepara para manan eleisaun no atu satan tiha tentativa esforsu tomak ne’ebé atu sobu fali estadu direitu demokratiku ne’e.

“Atu reazusta FRETILIN, atu sai husi ne’e unidade ida que metin tebes, sei la husik ema liur atu sobu FRETILIN i ho objetivu últimu atu manan eleisaun ne’ebé iha 2023. Imi sei haree FRETILIN sai husi ne’e bo’ot liu tan, metin liu tan i sei manan eleisaun”,dehan Alkatiri.

Alkatiri mós rejeita informasaun ne’ebé espalla iha públiku katak, FRETILIN fahe malu, maibé ho konferensia ba datoluk refere bele hametin diak liu FRETILIN nune’e bele konkore iha eleisaun tuir mai.

“Se mak hanoin katak FRETILIN atu rahun entaun bele toba mehi nafatin ba, tanba durante tinan 5 ne’e ha’u servisu oituan deit, tanba ha’u servisu ba Estadu. Agora ha’u fó obrigadu ba AMP tanba ha’u husik tiha servisu ba Estadu iha Oe-Cusse agora ha’u 100% lidera FRETILIN sai tiha forte liu tan iha futuru”.

Enkuantu konferensia  FRETILIN ba datoluk ne’e hala’o durante loron rua hahú husi loron 21-22. Konferensia refere atu hametin estrutura FRETILIN iha nível nasionál to’o ba iha baze, hodi prepara ba eleisaun iha tinan 2023 oin mai.

Timor-Leste iha tinan 2017 tama ba eleisaun parlamentar antesipada, hafoin Prezidente Repúblika, Francisco Guterres Lú Olo, disolve Parlamentu Nasional, tanba orsamentu jeral Estadu ne’ebé hatama husi Governu minoritáriu FRETILIN-PD hetan sumba iha Parlamentu Nasional.Aes