JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

OJE la pasa tanba CNRT sai vítima iha koligasaun AMP ■KHUNTO arepende, PLP prontu simu desizaun PR

OJE la pasa tanba CNRT sai vítima iha koligasaun AMP ■KHUNTO arepende, PLP prontu simu desizaun PR

Orsamentu Jeral Estadu (OJE) tinan 2020 ho montante biliaun USD 1.668, la pasa iha Parlamentu Nasionál, tanba maioria deputadu bankada CNRT senti sai vítima iha koligasaun Aliansa Mudansa ba Progresu (AMP).

Xefe bankada CNRT, Duarte Nunes, hateten, CNRT vota kontra Orsamentu Jeral Estadu tinan 2020, tanba CNRT sente sai vítima ba koligasaun Aliansa Mudansa ba Progresu (AMP), ne’ebé la fó benefísiu ba partidu CNRT.

Duarte Nunes haktuir, bankada CNRT sai vítima ba koligasaun AMP ne’e, tanba kuadru partidu CNRT nain hitu mak to’o agora seidauk simu pose husi Prezidente Repúblika, maske governasaun AMP la’o durante tinan rua ona.

“Iha situasaun ne’e, tuir ami-nia analize, partidu CNRT mak sofre liu, tanba nia ema nain hitu, hamutuk ho KHUNTO nian mak la hetan pose, no durante tinan rua ami sente hanesan hetan persegisaun polítika ne’ebé la justu, tanba bainhira akuza CNRT nia membru laiha prosesu judisial, entaun ami konsidera hanesan persegisaun ida ne’ebé organizadu, no ami lamenta Primeiru Ministru la buka dalan atu ultrapasa situasaun ida ne’e”, katak Duarte Nunes iha Parlamentu Nasionál Sesta (17/01), hafoin votasaun ba jeneralidade OJE 2020 ne’ebé la passa iha Parlamentu Nasionál.

Duarte Nunes afirma, durante tinan rua bankada CNRT preokupa tebes, tanba programa VIII governu ne’ebé nia objetivu atu kumpri PDN 2011-2030, hasoru dezafiu bo’ot wainhira Governu la konsistente, la disiplina no viola nia sistema ka mekanismu ezekusaun ne’ebé hatúr tiha ona iha Governu anterior sira.

Tanba ne’e, CNRT konsidera katak, intensaun atu halo kontinuasaun ba programa ne’ebé harii ona iha Governu anterior ne’e, laiha konsiderasaun iha VIII Governu ne’e.

“Ida ne’e ami lamenta tebes, tanba mehi bo’ot CNRT nian atu diversifika osan minarai, no lori povu ba moris diak, kontinua infrenta obstakúlu oi-oin, ida ne’e triste tebes tanba CNRT tenke hasoru situasaun ida ne’e, iha uma laran koligasaun nian”, relata Duarte Nunes.

Lee hotu :   PM Taur apoia partisipasaun TL iha espozisaun Dubai

Xefe bankada CNRT ne’e hatutan, situasaun ne’ebé hahú husi Governu inisia nia mandatu, situasaun ne’ebé VIII Governu hasoru bainhira hakat ba ukun ho ain karuk, tanba ain los hela tiha iha palásiu Prezidente Repúblika, no situasaun  ida ne’e mak lori TL ba impase to’o oras ne’e.

“Situasaun ne’e nia konsekuensia mak, povu mós sofre no terus tanba ekonomia enfrakeza tanba impase ne’e. ita hotu akompaña katak, mosu tiha impase maibé laiha kapasidade atu Estadu ultrapasa situasaun ida ne’e. sei situasaun ida ne’e mak kontinua la ultrapasa, ita bele lori nasaun ne’e ba valensia, tanba ne’e ami hanoin ita presija tau situasaun ne’e iha konsiderasaun atu nune’e ita tenke ultrapasa, labele tinan rua ita fó marjen atu hanaruk situasaun ne’e, tanba la’os ita sira ne’e mak terus, maibé povu mak terus”, katak Duarte Nunes.

Duarte Nunes mós espera katak, ho OJE tinan 2020 ne’ebé Parlamentu debate ne’e, karik la’o to’o iha rohan, bele iha posibilidade atu hadia povu nia moris.

Iha fatin hanesan, deputada bankada Kmanek Haburas Unidade Nasionál Timor-Oan (KHUNTO), Olinda Guterres, deklara, KHUNTO arepende hola parte iha koligasaun Aliansa Mudansa ba Progresu (AMP) ne’ebé  kompostu husi PLP no CNRT,  tanba fó fali votus abstensaun ba Orsamentu Jerál Estadu (OJE) 2020 husi nia governu rasik.

Desizaun deputadu sira bankada CNRT ne’ebé maioria fó votus abstensaun no ida kontra ne’e, halo bankada KHUNTO arepende tebes, no deklara, se karik antes ne’e mak hatene hahalok partidu membru koligasaun balun nune’e, KHUNTO deside la hola parte kedas ba koligasaun AMP ne’e.

“Bainhira ita halo koligasaun no kampaña, ita kompromete buat oi-oin, maibé mai iha ne’e ita halo rungu-ranga hotu, halo barralla hotu governu nia hanoin. Ha’u lahatene, primeira-vez ha’u nia partidu liu, ha’u hetan kadeira lima, afinal mai sai fali hanesan ne’e. Ha’u nia fuan ne’e moras, ha’u nia partidu foun, karik loron ruma ita bo’ot sira bolu mós, hau sei fila kotuk ba ita bo’ot sira”,deklara Olinda Guterres.

Lee hotu :   Alkatiri ho Ramos Horta, La preokupa ho situasaun polítika

Iha fatin hanesan, Xefe bankada PD, António da Conceção sujere ba koligasaun AMP ne’ebé kompostu husi partidu tolu, CNRT, PLP no KHUNTO, atu konvida Prezidente Repúblika Francisco Guterres Lú Olo, hodi halo diálogu, tanba povu barak sei kontinua moris ho sofrementu, maske ukun an tinan 20 ona, píor liutan, ho aktu arogansia polítiku sira nian, aumenta tan sofrementu povu moris ho tempu naruk.

“Polítika ne’ebé ita opta, ladauk reflete di’ak vontade ida ne’e, tanba ita sei esklui malu, hafahe líder sira husi grupu ida ba grupu seluk, tau ida-ida nia interese, no píor liu la tau respeitu ba líder sira, pelu kontrariu ita trata át balun no hahi balun. Líder sira ne’e mak ita-nia mata-dalan, nu’udar ai-hun bo’ot, bainhira ita presiza mahon, no bainhira ita presiza hanoin, hakbesik ba hodi husu. Ho hanoin ida ne’e, PD hakarak fó hanoin ba líder sira ba diálogu, maibé diálogu la’os hanesan ema barak ko’alia katak, atu fahe kadeira ba malu, maibé díalogu nu’udar mós dalan atu halibur hanoin hodi defende interesse nasionál, no promove dezenvolvimentu ida ba nasaun no mós ba jerasaun ida agora, inklui mós ba jerasaun ida iha futuru. Díalogu mós halo ita-nia instituisaun Estadu, órgaun soberania hala’o nia knár ho loloos, maibé mós atu komplementa hodi garante estabilidade governativa. Diálogu bele lori mós governu kompleta nia estrutura, atu nune’e labele taka dalan ba malu. Tanba ne’e, bankada PD sujere ba AMP, atu ko’alia ho Prezidente Repúblika, nune’e PR mós bele halo sedensias polítika hodi halo diálogu no parte ho bele halo sedensia ba malu ho halo situasaun ne’e sai di’ak”,afirma Xefe bankada PD ne’e.

Lee hotu :   PR prezide reuniaun ho membru Konsellu Estadu, Alkatiri: Ita hotu hein desizaun Prezidente

Maibé Primeiru Ministru (PM), Taur Matan Ruak, hatete, pozisaun ba oin Governu sei hein de’it desizaun husi Prezidente Repúblika, Francisco Guterres Lú Olo.

Taur Matan Ruak mós apela ba povu Timor-Leste atu mantein paz hodi fó konfiansa nafatin ba governu da ualu atu ultrapasa situasaun ne’e.

“Agora ita hein de’it mak Sua exselensia Prezidente Repúblika, akompaña naturalmente debate no desizaun PN nian. Sei konvoka no ita haree tok, pasu loron hira tuir mai ne’e oinsa, maibé hotu-hotu tenke kalma, no fó fiar nafatin. Ita hein tok saida mak akontese, bele dala ida tan, tanba desizaun agora fila PR, ba eleisaun antesipada ka halibur fali partidu sira ne’ebé asentu iha PN, ne’e PR mak hatene ona. Hanesan CNRT nia deklarasaun, sira la kontenti ba buat rua, ida tanba sira-nia membru sira seidauk toma posse, ida seluk tanba iha buat balu ne’ebé sira la gosta iha governasaun”,katak PM Taur.

OJE tinan 2020 ne’e, la pasa iha jeneralidade tanba hetan votus a favor 13, kontra 15, abstensaun 25, maibé iha deputadu 12 mak la marka prezensa wainhira halo votasaun.say

Add to Comments Here!!!!

error: Content is protected.
Secured By miniOrange
You might also like:
PM la tolera ema sivíl baku membru F-FDTL ■Lere: PM tenke sai lalenok ba forsa hotu

Komandante Unidade Polísia Militar Majór Abel...

Ramos Horta: Laiha pena de morte, droga kontinua tama TL

Eis Prezidente Repúblika (PR), José Ramos...

Dom Virgílio: Joven tenke onestu no iha responsabilidade

Arcebispo Arquediocese Metropolitano Dili, Virgílio do...

Close