Veteranu dezmobilizadu 20 to’o 24, sei simu USD 40.000

Governu liu husi Konsellu Ministru (KM) aprova projetu dekretu Governu kona-bá regulamentu apoiu finanseiru ne’ebé sei atribui ba veteranu kombatente libertasaun nasionál ho tinan dedikasaun eskluziva 20 to’o 24, kada ema ida hetan USD 40.000.

Ministru Prezidensia Konsellu Ministru (MPKM), Fidelis Leite Magalhães, hatete, dekretu Governu ida ne’e loke dala ba Ministériu Asuntu Kombatente Libertasaun Nasionál (MAKLN), hodi implementa programa apoiu finanseiru ba kombatente libertasaun nasionál.

“Dekretu Governu ne’e loke dalan ba MAKLN hodi implementa programa ida ne’ebé mak fó apoiu finanseiru ba kombatente veteranu libertasaun nasionál sira ne’ebé dezmobilizadu no tinan kontribuisaun ba luta libertasaun ukun rasik-an ida ne’e husi tinan 20 to’o 24”, MPKM ne’e iha palásiu Governu, Kuarta (28/10/2020).

Porta Voz Governu ne’e, esplika, sira hirak ne’e hetan apoiu finanseiru husi Governu ho valor orsamentu rihun USD 40, kada ema ida, apoiu ida ne’e sei ajuda sira hodi harí uma ho dignu.

“Osan ne’e sei atribui ba kombatente libertasaun nasionál ne’ebé dezmobiliza husi tinan 20 to’o 24 luta nian ne’ebé seidauk iha abitasaun kondigna ida no adekuadu, ne’ebé dau-daun ne’e konstrui ninia abitasaun própria seidauk finaliza ka ne’ebé iha abitasaun kondigna no adekuada ida”, tenik Governante ne’e.

Antes ne’e, Ministru Asuntu Kombatente Libertasaun Nasionál, Júlio Sarmento da Costa “Meta Mali”, informa, veteranu dezmobilizadu ne’ebé ho tinan dedikasaun eskluziva 20-24 ne’ebé Governu sei fó apoiu hamutuk 103. Cin