CNRT apoia Cedelizia lori PPN ba tribunál

Bankada CNRT sei fó apoiu ba Sekretária Jerál Parlamentu Nasionál (PN) sesante Cedelizia Faria dos Santos bainhira lori Prezidente Parlamentu Nasionál (PPN), Aniceto Guterres ba tribunál, tanba halo destituisaun la ho justu.

Vise Xefe Bankada CNRT, Patrocínio Fernandes klarifika, kona-bá ezonerasaun ba CNRT la’ós buat foun, maibé normal ona, ida ne’e mak karakter husi FRETILIN, ne’e mak FRETILIN nian servisu, hafoin hamoos iha ministériu sira agora to’o ona iha PN.

“Atu lei ou lae ha’u lakohi komenta barak, ita-boot sira hatene sira mós hatene lei, maibé ba sira lei la iha, maske Cedelizia husi selesaun ita-nia lei aas liu iha Timor-Leste mak konstituisaun, konstituisaun ema bele viola sá tan rejimentu PN. Ha’u hanoin Cedelizia la’ós tanba nia nu’udár kuadru husi partidu CNRT. Maibé partidu CNRT ba povu ba sidadaun ne’ebé mak hasoru justisa CNRT iha nia kotuk, sé bainhira nia nu’udár sidadaun ida buka CNRT iha kotuk”, Vise Xefe Bankada CNRT ne’e iha PN, Sesta (27-11-2020).

Xefe bankada FRETILIN, Francisco Miranda Branco, hateten, kona-bá ezonerasaun Sekretária Jerál PN, Cedelizia Fária dos Santos ne’e husu klarifikasaun husi PPN.

“Tuir loloos konkursu públiku ne’e mós kestionavel prosesu iha parte ida la konkorda halo rekursu ba Minstériu Públiku, ha’u hanoin ita para de’it iha ne’e”, tenik Branco.

Tuir lei PN númeru 15/2008 Lei Organizasaun no Funsionamentu Administrasaun Parlamentár (LOFAP) artigu 41 kona-bá nomeasaun no destituisaun estatutu Sekretária Jerál husi PPN hafoin rona bankada parlamentár ne’ebé hakarak aprezenta kandidatu foun. ety