PN husu PR-Governu implementa EE iha de’it fronteira

Xefe Bankada UDT, Francisco David Carlos “Abono Ramkabian”, husu Governu no Prezidente Repúblika (PR), Francisco Guterres “Lú Olo” atu deklara Estadu Emerjénsia (EE) ne’ebé parsíal ou iha de’it fronteira, atu nune’e fulan-fulan lalika preokupa ho estensaun EE.

“Iha Timor ne’e ita iha fronteira terestre no marítima, ho ita-nia país viziñu sira ne’e tenke kria lei EE, maibé parsíal, labele fulan-fulan PR preokupa ho estensaun EE ne’e ladun di’ak ida, importante mak ita-nia povu ne’e mós livre no avontade, hodi hala’o nia moris ne’e ba oin”, Xefe bankada UDT ne’e iha Parlamentu Nasionál (PN), Segunda (23/11/2020).

Deputadu opozisaun ne’e dúvida mós ho prezensa COVID-19 iha Timor-Leste, tanba durante ne’e laiha ona distánsia sosiál, inklui kuaze ema barak halo festa iha fatin-fatin.

“Ha’u kuaze laiha tiha ona konfiansa ba iha COVID-19 ne’e, tanba distansiamentu sosiál de’it laiha, iha Timor ne’e festa kalan loron, ema dansa liman kaer malu, ita haree ho esperiénsia sira ne’e halo ha’u dehan hanesan ne’e sera que COVID-19 ne’e tama mai duni ou la’e, maibé ho buat ne’ebé laiha espesialidade atu proteje ita-nia sidadaun sira ne’e, tanba ne’e mak ami fó apoiu tomak ba lei protesaun sivíl ne’ebé sei enkamina ba PR”, tenik Abono Ramkabian.

Entretantu Timor-Leste implementa ona EE ba dahitu, hodi prevene transmisaun COVID-19 iha Timor-Leste. mar