CNRT husu Governu suspende distribuisaun sesta bázika iha fronteira

Bankada CNRT sujere ba VIII Governu Kontituisionál atu suspende lai  distribuisaun sesta bázika ba munisípiu ne’ebé fronteira ho Indonézia, nune’e bele prevene transmisaun COVID-19 mai iha Timor-Leste (TL). Tanba númeru COVID-19 kada loron aumenta ba bei-beik iha nasaun viziñu Indonézia no rezulta ema balun mate.

“Ha’u fó hanoin de’it ba Governu, liu-liu ba ami fronteira, la’ós Bobonaro de’it, Suai no Oe-Cusse ha’u hanoin sesta bázika suku sira ne’ebé mak ha’u hanoin suspende lai, tanba ita haree moras ne’e besik loos iha ita-nia fronteira ne’e. Ne’e ha’u nia opiniaun de’it, Governu tetu to’ok, sé la’e ita fahe tiha sesta bázika ema sira sorin mós aproveita mai ita la hatene, tanba ema barak sira hosi mota-sorin mós kor hanesan ho ita, sé ita hakarak prevene moras ne’e labale da’et ba ita, maske ita tau seguransa barak”, Deputadu bankada CNRT, Marcos Xavier, liu hosi ninia interevensaun iha plenária, Tersa (26-01-2021).

Deputadu bankada CNRT ne’e, Governu tenke fó kompeténsia ba autoridade lokál sira, atu nune’e sira be;e servisu maka’as hodi evita sira-nia komunidade halo atividade ilegál iha fronteira terrestre.

Entretantu tuir dadus hosi Ministériu Saúde, dau-daun ne’e Timor-Leste rejista kazu pozitivu COVID-19 hamutuk ema na’in 17. Ety