Ohin, PN presta omenajen ba deputadu Guntur

Parlamentu Nasionál (PN) ohin Segunda (25/01) presta omenajen ikus ba saudozu deputadu Sabino Soares ‘Guntur’, hosi bankada Partidu Libertasaun Populár (PLP) ne’ebé remata ona nia peregrinasaun iha  mundu.

Saudozu hakotu iis iha loron 23, fulan ne’e, iha Hospital Nacional Guido Valadares (HNGV) hafoin baixa iha HNGV kuaze fulan ida, tanba sofre moras ran-midar ka diabetes.

Sabino Soares Guntur nu’udár deputadu ativu kinta lejislatura, ne’ebé husik hela fen no oan na’in lima.

Vise Prezidente Parlamentu Nasionál (PN), Maria Angelina Sarmento, informa, PN ho PLP, inklui família matebian sei koordena, atu nune’e bele fó omenajen ikus iha PN antes haloot.

“Agora dau-daun PN ho PLP sei halo koordenasaun hela ho família, para atu haree oinsa mak ninia prosesu ida hahú hosi presta omenajen to’o ninia serimonia funeral ne’e, bele eleva komponente hotu ne’ebé mak iha interese ka iha síkulu ida para atu bele kontribui ba prosesu funeral ne’e. Tanba deputadu Guntur hanesan membru PN ativu iha kinta lejislatura nian, entaun ami haree posibilidade atu halo últimu omenajen ne’e iha opsaun rua, iha Domingu ou iha Segunda-feira semana oin. Maibé sé Domingu laiha posibilidade, tanba deputadu sira barak mak desloka ona ba foho, entaun ajenda ba Segunda-feira, presta omenajen tiha hafoin entrega ba família halo serímonia kultural serímonia funébre”, informa segundu Vise Prezidente PN ne’e iha mortuáriu HNGV, Sábadu (23/01/2021).

Deputada PLP ne’e afirma tan, partidu ho família sei haruka pedidu ida ba Prezidente Repúblika (PR), atu nune’e bele haloot mate-isin iha Jardim Dos Herois Metinaro, tanba deputadu ne’e seidauk rejista iha komisaun omenajen.

“PN ho família no mós organizasaun rezisténsia ne’ebé deputadu Guntur pertense ba sei tenta atu haree to’ok posibilidade atu husu ka solisita rekerimentu ida ba PR, atu dekreta para deputadu Guntur bele halo’ot iha Jardim dos Herois Metinaro. Tanba dezafiu ida ita hasoru agora mak deputadu Guntur seidauk rejista iha komisaun omenajen, maibé tanba ita barak hatene malu, ema ne’e kontribui ka la kontirbui ikus mai PR dekreta duni hodi hala’o nia funebre iha Jardim dos Herois Metinaru”, afirma deputada Maria Angelina.

Matebian deputadu Sabino Soares Guntur moris iha Quelecai-Baucau, iha loron 8, Fulan Jullu, tinan 1975 no remata nia peregrinasaun ikus iha loron 23, fulan Janeiru, tinan 2021.

Matebian hakna’ar-an hanesan membru PN reprezenta PLP, nu’udár mós membru ba komisaun G ne’ebé trata asuntu edukasaun, juventude, kultura  no sidadania, hahú iha tinan 2018 to’o husik mundu.

Iha mandatu kinta lejislatura ne’e, PN lakon ona deputada Albina Marçal Freitas hosi bankada CNRT, deputadu UDT, Gilman Exposto ho deputadu Sabino Soares ‘Guntur’ hosi PLP. say