JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN husu Governu fornese bee-moos ba eskola sira

PN husu Governu fornese bee-moos ba eskola sira

Deputadu Parlamentu Nasionál (PN) husu ba Governu atu fornese bee-moos no liña internet ba eskola hotu iha territóriu Timor-Leste (TL) laran tomak.

Nune’e bele prevene transmisaun COVID-19, liu hosi fase-liman bei-beik no garante distánsia sosiál liu hosi liña internet fásil fasilita estudante no profesór sira.

“Ita iha nesesidade boot para atu hadia kondisaun, por volta de 1.200 eskola iha Timor, ha’u hanoin ladún susar ba ita atu hadia sira-nia kondisaun, fornesimentu bee-moos, saneamentu, kondisaun laboratóriu sira, inklui laboratóriu komputadór no ligasaun internet, tanba iha situasaun agora presiza tebes mak ligasaun internet ba eskola hotu-hotu. Ministériu transporte iha, hanoin ministériu rua ne’e servisu hamutuk, hanoin ita bele ona hadia kondisaun eskola hotu-hotu”, Deputadu bankada PLP, Abel Pires iha plenária, Tersa (16/02/2021).

Alénde ne’e, deputada CNRT, Fernanda Lay mós preokupa, tanba estudante balun uza máskara ida ba semana tomak no balun uza plástiku no lensu, tanba iha difikuldade atu hetan máskara. Nune’e husu ba Ministériu Edukasaun atu fornese ba eksola hotu.

“Liga ho ita-boot sira-nia planu ne’ebé mai, ha’u halo ona pergunta ne’e iha plenárias ordinárias, maibé laiha resposta hosi ministru. Fornese subsídiu internet 67.500 alunos no porfessores iha Ensinu Superiór no 1.65 mil alunos iha Ensinu Sekundáriu, ida ne’e to’o iha ne’ebé. Tanba bainhira ha’u ko’alia ho Ministériu Transporte no Komunikasaun (MTK), ita sei hein fibra ótika, waoooo, fibra ótika seidauk mai, to’o bainhira loos, sé ita tau subsídiu iha ne’e, la ezekuta, bele muda ba hola fali buat seluk, hanesan vasina ka, bee, maske ba alunu sira, hand sanitizer, bee no sabaun, para prevene moras ne’e labele kona”, afirma Fernanda Lay.

Iha fiskalizasaun komisaun F detekta katak, iha alunu barak iha eskola uza sira-nia máskara la so’e, ida ne’e la íjiene no tuir loloos máskara loron ida troka dala rua, labele liu hosi oras haat.

“Oinsa ho estudante sira ne’ebé mak ita-boot sira permite sira eskola, ne’e la’os de’it Díli, iha Díli ne’e sei iha netik osan, maibé iha foho ne’e? ema balun uza de’it, lensu, balun plástiku. Ha’u preokupa, tanba ita iha diskriminasaun barak, hanesan sesta bázika, máskara ne’e iha diskriminasaun. Orsamentu ne’e mai hatene iha, PN aprova iha ne’e, ami hatene, maibé ami kuandu husu kontas, ita hotu hateke ba malu, hanoin ne’e materiál ida ne’ebé ita-boot sira ba talking iha ne’ebá”, Deputada bankada CNRT ne’e.

Hatán ba asuntu ne’e, Ministru Edukasaun, Armindo Maia, deklara, Governu halo esforsu hotu hodi implementa rekomendasaun Organizasaun Mundiál Saúde (OMS), atu prevene COVID-19 iha eskola hotu, maibé governante ne’e konsidera imposível atu fahe máskara loro-loron ba estudante hotu iha Timor laran tomak.

Nia dehan, Governu halo esforsu tomak atu responde ba problema relasiona ho COVID-19, nune’e Governu servisu mós ho parseiru sira konsege rezolve problema balun ona.

“Esforsu ne’ebé ita halo balun responde ona, maibé hanesan máskara ne’e ita hatene hanesan ita uza ne’e, másimu kada loron ida tomak, restu ita tenke so’e, tanba ne’e mak ami hosi ministériu enkoraja para atu uza máskara hena, durante ne’e parese distribui ona máskara serka de 30 mil, para hena ne’e bele fase, la’ós hanesan máskara ida agora ita uza sira ne’e, (biru mihis), ita sei sosa tan para aumenta tan máskara sira hena ne’e, tanba serka de 400 mil alunos, agora loro-loron mak ita atu fó 400 mil máskara, ha’u la hatene loos, ne’e difísil, lojístikamente la fasíl”, informa Armindo Maia.

Kona-bá liña internet ba eskola sira Governante ne’e hateten, ideia hakarak eskola sira ita uza internet, maibé dau-daun ne’e eskola balun ho kondisaun seidauk própriu.

“Neste momentu ita hotu hatene kondisaun eskola, sala de aula de sei rungu-ranga, la sufisiente, kadeira meja de’it mós seidauk iha, ita sei halo nei-neik para pelumenus, komesa ezemplu kada munisípiu 10 eskola, depois ita aumenta nei-neik. Ligasaun internet ne’e problema boot ida, ema hotu hatene programa eskola ba uma, ne’e inan-aman sira komplain dehan sira gasta pulsa barak liu, duke ba eskola hanesan bai-bain, ne’e dezafiu boot ida”, responde Governante ne’e.

Liu hosi reuniaun Konsellu Ministru semana ne’e, Governu deside bandu ema tama-sai iha munisípiu rua kompostu uhsi Covalima ho Bobonaro, hahú hosi Tersa, loron 16, fulan Fevereiru to’o loron 3, fulan Marsu, tinan 2021 ne’e. say

Lee hotu :   LERE: HA'U HALO POLÍTIKA BA DEFEZA NO SEGURANSA ■ LA KONTRA MAUN XANANA

Add to Comments Here!!!!

error: Content is protected.
Secured By miniOrange
You might also like:
Hamutuk ho feto, MCS hakotu iis iha otél

Abitante ida ho inisiál MCS hakotu...

Governu prosesa ona pagamentu ba distribuidór sesta bázika

Ministru Koordenadór Asuntu Ekonómiku (MKAE), Joaquim...

Padre Emanuel: Sarani tenke kria solidariedade ba malu

Padre Emanuel Lelo Talok, hateten, durante...

Close