Seidauk halo levantamentu OJE, la fó impaktu ba dezenvolvimentu

Primeiru Ministru (PM), Taur Matan Ruak, hateten, bainhira Governu seidauk halo levantamentu ba Orsamentu Jerál Estadu (OJE)  tinan 2021,  la fó impaktu ba programa dezenvolvimentu ne’ebé Governu trasa ona.

“Ha’u hanoin ita-boot sira rona demais iha liur, la rona Governu, fila ba mai ita-boot sira preokupa dehan osan laiha, ami mak kaer dapur, loloos ne’e ami mak dehan hahán laiha ona ka sei iha, ita-boot sira hán ne’e mak preokupa la halimar ne’e”, PM ne’e ba jornalista sira, Kinta (18/02/2021), iha Palásiu Prezidensiál Nicolau Lobato, Bairro Pite, Díli, hafoin remata enkontru ho Prezidente Repúblika, Francisco Guterres Lú Olo.

PM Taur, dehan, informasaun ne’ebé nia simu husi Ministériu Finansa (MF), seidauk iha nesesidade atu halo levantamentu, maibé kuandu nesesidade obriga sei halo, tanba ne’e lalika preokupa.

“Seidauk iha implikasoens, seidauk afeta, imposivél Governu ida halo tiha programa tau tiha orsamentu, depois nia lakohi implementa fali, ne’e imposivél no lójika laiha. Ne’ebé di’ak liu ita-boot sira lalika rona rumoris sira la’o tun la’o sa’e ne’e, tanba ema dehan Timor ne’e ema matenek tan-tanan de’it, na forma ita levanta kestoens ruma, ema dehan la’ós matenek, nia keta beik karik”, nia hatutan.

Nune’e, Xefe Governu ne’e, subliña, kuandu Governu presiza naturalmente Governu sei foti, tanba ne’e laiha problema. oly