PN preokupa povu Bobonaro-Covalima hamlaha

Parlamenu Nasionál (PN) kinta lejislatura preokupadu los ho populasaun iha munisípiu Covalima ho Bobonaro ne’ebé implementa regra serka sanitária, difikulta buka moris, no infrenta hamlaha, tanba sasán folin sa’e no stock ai-han menus.

Deputadu bankada Fretilin, Alexandrino Cardoso, haktuir, stock ai-han iha Covalima hahú menus, no nesesidade bázika, hanesan foos no mina folin sa’e, nune’e husu Governu atu hola medida ho urjénsia, nune’e povu labele mate hamlaha.

“Haree ba nessesidade báziku, ha’u hakarak fó de’it dadus balun ne’ebé ha’u foin simu, liu-liu kona-bá foos. Foos iha Tilomar, 20 dollar por sakas, 20 kilograma ne’e, iha Fatumea 17 dollar, iha Fatululik 18 dollar, iha Fohorem 17 dollar, Zumalai, Mau-Katar 16 dollar, kios sira ne’e stock laiha hotu ona, atividade hotu paradu, komunidade sira agora halerik hela ba aihan sira ne’e. Tanba ne’e, husu governu atu bele buka solusaun, liu-liu ba foos”,tenik deputadu Alexandrino iha debate EE da-11, Segunda (01/03/2021).

Nune’e mós deputadu PD, Adriano do Nascimento, reforsa katak, Governu iha responsabilidade atu asegura populasaun nia nessesidade, inklui animal sira, nune’e, labele lakon leet de’it, iha ámbitu izola aan.

“Bainhira mak Governu atu lori hahán ho nesesidade bázika sira seluk ba iha Covalima”,husu deputadu PD ne’e.

Liuhosi teste massal ne’ebé Ministériu Saúde halo, identifika kazu pozitivu na’in sanulu iha Covalima, hosi postu adrministrativu Fatumea ho Tilomar, no dadaun ne’e, ekipa saúde sei kontinua hala’o teste swab ba populsaun iha fronteira.Say