Kay Rala Xanana Gusmão hato’o agradesimentu ba Governu Indonézia

FOTO: MedSos

Líder Karismátiku, Kay Rala Xanana Gusmão, hato’o agradesimentu ba Governu Indonézia ne’ebé fó atensaun no solidariedade durante hala’o tratamentu ba ninia saúde iha Jakarta-Indonézia.

Xanana Gusmão hato’o agradesimentu ne’e iha enkontru ida ho Ministru Negósiu Estranjeiru Indonézia, Retno Marsudi, Kinta (26/11/2020) dader, iha Ministériu Negósiu Estranjeiru, iha Jakarta.

Líder Karismátiku ne’e hato’o agradesimentu mós ba Ministra Retno Marsudi hanesan kolega antigu ne’ebé mós fó atensaun ba iha kestaun Fronteira Marítima (FM) entre Timor-Leste no Indonézia.

Xanana Gusmão deskloka ba Jakarta-Indonézia, iha loron 18, fulan Novembru, ho aviaun Jet Privadu, hodi ba hala’o tratamentu ba nia saúde (Check Up).

Líder Nasionál ne’e halo Check Up ba nia saúde iha Jakarta ne’e hanesan rutinidade ne’ebé tinan hirak liu ba mós nia halo hela ona, hodi hatene ninia kondisaun saúde. GMN