JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Bolseiru 17 husi Wuhan-Xina fila mai TL, MS sei kontinua halo observasaun ba sira

Bolseiru 17 husi Wuhan-Xina fila mai TL, MS sei kontinua halo observasaun ba sira

Diretora Jerál Prestasaun Saúde, Ministériu Saúde (MS), Odete da Silva Viegas hateten, wainhira bolseiru 17 husi Wuhan-Xina fila mai Timor-Leste (TL), MS sei kontinua halo observasaun ba sira nia saúde.

“MS hamutuk ho Ministériu Negósiu Estranjeiru no Kooperasaun (MNEK) iha nafatin kontaktu oinsa informasaun kona-bá evakusaun estudante 17 ne’e governu Nova Zelándia halo karantina iha ne’ebá nafatin hafoin loron 14 fila, MS sei akompaña nafatin sira nia kondisaun, maibé durante loron 14 iha karantina Nova Zelándia livre ona husi  korona vírus, ne’e duni kuandu sira fila mai Timor, ita bele halo observasaun ba sira, tanba ita la preokupa ona sira mai nafatin ho moras ida ne’e”, Diretora Jerál Prestasaun Saúde MS ne’e ba jornalista sira bainhira partisipa iha workshop nasionál ba média sira relasiona ho korona virus ne’ebé sai preokupasaun  mundial, iha salaun Maubara Room Timor Plaza, Díli, Sesta (07-02-20).

Odete esplika, papél média importante atu públika informasaun ba públiku, iha nível nasionál no munisipál kona-bá vírus corona, tanba ne’e, MS kontinua husu informasuan kona-bá evakuasaun estudante iha Nova Zelándia mai TL.

“Ohin MS hamutuk ho Organizasuan Saúde Mundiál (OMS) hanoin katak prioridade atu fahe informasaun kona-bá korona vírus ba ita boot sira, ne’ebé iha papel importante, hanesan jornalista informasaun saída de’it mak fó sai ba públiku ou ba komunidade, jornalista mak transmite mensajen, tanba ne’e pertinente jornalista sira hatene uluk koñesementu balun kona-bá moras korona vírus, nune’e bele hatutan mensajen husi MS ba komunidade sira iha área rural iha nível nasionál no nivel munisipál”, katak Diretora Jerál Prestasaun Saúde MS ne’e.

Lee hotu :   Antisipa virus corona tama TL, MS distribui mákina Termo Focus iha pontu Entrada sira

Tuir Odete katak, MS hala’o ona preparasaun iha loron 7 fulan janeiru tinan ne’e, fó sai hetan moras penemónia ho nia kauza deskuñeside, MS hala’o kedas ona enkontru tekniku nível Ministériu, hamutuk ho OMS, ne’eb’e iha responsabilidade atu apoiu ba MS.

“Maske korona vírus sai preokupasaun global, maibé Graças a Deus ita seidauk hetan kazu, maibé ita suspeita kazu ida ne’e, iha duni forsa FALINTIL-Forsa Defeza Timor-Leste (F-FDTL) na’in 2 mak tuir treinamentu iha Xina fila mai forsa ne’e ho nia vontade rasik ba óspital nasionál, tanba sira mós preokupa ho moras ida ne’e, maibé ikus mai laiha sintoma ruma, signifika sira nia saúde di’ak”, tenik nia.

Hatán kona-bá informasaun ne’ebé espalla iha públiku hodi dehan, iha estudante balun hala’i husi Xina mai TL, Odete responde, sé estudante balun fila ona mai TL, ekipa kontinua buka nafatin sira-nia númeru kontaktu atu nune’e bele halo observasaun ba sira-nia kondisaun.

“Ita boot sira rona rumoris ema Xina no iha ema balun ne’ebé afetadu, maibé ekipa servisu husi komisaun surtu ne’e rasik seidauk identifika ema ho korona vírus tama iha ita-nia rai”, afirma Diretora Jerál Prestasaun Saúde MS ne’e.

Iha fatin hanesan reprezentante OMS iha TL, Rajesh Pandav hateten, OMS halo breefing ba parte liña ministériál no mós Parlamentu Nasionál (PN) no dau-daun ne’e bolu média liña MS sira hodi halo esplikasaun kona-bá vírus corona.

“Agora dau-daun ita-nia komunidade Xina sira sira iha ita-nia rai no husi Xina mak mai ka, kuandu iha problema ruma OMS sei komunika hamutuk ho liña ministeriál, liu-liu MS no importante mak ita sira iha ne’e, hanesan parseiru ida ne’ebé mak importante tebes atu fahe informasaun ne’ebé loloos, atu nune’e, labele iha rumoris oi-oin, sé la’e ita-nia povu ne’e bele trauma, ne’ebé wainhira média presiza informasaun, bele ba iha OMS, tanba OMS loron ba loron sempre update hela de’it informasaun kona-bá corona vírus”, informa Rajesh.

Lee hotu :   PN husu Governu apoia inisiativa veterana Kasian harii eskola

Tuir dadus, pasiente vírus corona alende iha Xina, da’et ona mós nasaun hamutuk 24, enkuantu dadus pasiente ne’ebé afetadu korona vírus iha Xina hamutuk rihun 20, husi númeru ne’e mate besik 500. eni

Add to Comments Here!!!!

error: Content is protected.
Secured By miniOrange
You might also like:
SERVE rejista kompañia 27.300 hala’o atividade negósiu iha TL

Diretor Ezekutivu SERVE, Florencio  Sanches hatete,...

Janeiru, klínika Bairo-Pité rejista ema 28 kona moras TBC

Doutór Klínika Bairo-Pité, Daniel Murphy, hateten...

Oan mane saudozu ‘Mau-Lelo’ agradese PR Lú Olo

Rui Carapinha, oan mane husi Saudozu,...

Close