JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

MS prepara ona karantina ba sidadaun mai husi estranjeiru

MS prepara ona karantina ba sidadaun mai husi estranjeiru

Governu liu husi Ministériu Saúde(MS), prepara ona fatin karantina iha Tibar, Bidau Meti-Aut no iha Audian, hodi halo izolamentu ba sidadaun sira ne’ebé mak fila husi estranjeiru.

Diretóra jeral prestasaun saúde, Odete Viegas, husu ba komunidade atu koopera ho ministériu saúde, tanba Timor-Leste (TL) rejista ona kazu ida ho pozitivu Corona Vírus Disease 2019 (COVID-19).

Odete hatutan katak, fatin karantina ne’ebé mak ministériu saúde prepara dadaun ne’e mak iha Tibar, iha Bidau Meti-aut mak uza hotel novu horizonte, inklui mós hotel ida iha audian, alende ne’e mós iha fatin izolamentu ida iha sentru saúde vera cruz.

Diretóra ne’e esplika, karantina no izolamentu iha diferensia, tanba karantina ne’e ba ema ne’ebé mak seidauk iha sintomas, no izolamentu ne’e ba ema ne’ebé mak sintomas ka afeta ona ba surtu COVID-19.

“Fatin ne’e ita utiliza ba karantina hahú ohin ba oin karik ita iha ona karantina obrigatóriu ida ne’ebé mak mai husi perbatasan ou mai husi mós Aeroportu ita utiliza fatin ne’e, ema ne’ebé mak tama iha karantina ne’ebé mak mai husi país afetadu mais sira laiha sintomas, maibé kuandu iha fatin karantina mak iha sintomas, ita muda kedas ba iha fatin izolamentu, fatin izolamentu iha vera cruz”,dehan, Diretóra Jeral Prestasaun Saúde, Odete Viegas ba Jornalista sira iha Tibar, Segunda (23/03/2020).

Iha fatin hanesan, Ministra Saúde Interina, Elia dos Reis husu, ba komunidade sira atu habai-án iha loron manas iha dader tuku hitu no tuku sia dader.

Tuir, Ministra saúde interina ne’e, iha ona pedidu ba Governu Xina no Kuba, tanba ne’,e sira sei apoiu ai-moruk iha tempu badak, tanba ne’e husu ba komunidade labele pániku ho situasaun ne’e, maibé fase liman ho sabaun bebeik, han hahan ho hijine, no deskansa ho di’ak.

Lee hotu :   Veteranu Baucau lamenta KO taka verifikasaun dadus

“Husu ba komunidade sira entre sete meia to’o nove dader haree loron manas sai oituan mai liur entre kontaktu ho loron manas depois bele halo atividade, tanba vitamina D ne’ebé mak produz iha ita nia isin lolon ho anti microba ne’ebé mai husi loron bele hasai ita nia imunidade ba ita nia isin lolon”, dehan, Elia dos Reis.

Nune’e mos, Prezidente Cruz Vermella Timor-Leste (CVTL), Madalena Hanjam mos apela, ba komunidade atu koopera ho Governu, nune’e coronavírus ne’e labele da’et ba ema seluk.

“Husu ba komunidade hakmatek husu ita hotu fasilita para governu bele halo serbisu ne’e importante, iha nasaun barak coronavírus ne’e komesa menus lá oho ema li-liu país ne’ebé mak koopera ho nia governu koopera ho didiak sistema izolamentu ne’e didiak karantina ne’e didiak ita seluk-seluk sei la kona”, garante, Madalena Hanjam.

Hafoin observa fatin izolamentu iha sentru saúde vera cruz, ekipa ministériu saúde akompañia husi líder karismátiku Kay Rala Xanana Gusmão, haree direta mós fatin karantina ne’ebé parte saúde prepara ona iha Tibar.

Hafoin fila husi Tibar ekipa refere kontinua kedas ba iha Aeroportu Internasionál Prezidente Nicolau Lobato hodi rega ai-moruk antiseptika disinfektan ba aredores aeroportu, no kontinua halo vizita mós ba sidadaun sira ne’ebé mak karantina hela iha hotel novu horizonte, inklui hotel audian.Ina

Add to Comments Here!!!!

error: Content is protected.
Secured By miniOrange
You might also like:
Infetadu COVID-19 mak aumenta iha TL, Xanana: Kontakta ba Xina ajuda ita

Eis Primeiru Ministru, Kay Rala Xanana...

Hetan sintoma COVID-19, Governu husu komunidade liga ba númeru 119

Konsellu Ministru (KM),aprova númeru emerjensia 119,...

Loja balun iha kapitál Díli hahú taka atividade negósiu

Loja balun iha kapitál Díli, hahú...

Close