COVID-19 halo atividade edukasaun iha TL paralizadu

FOTO:MedSos

Vise Ministru Edukasaun Juventude no Desportu (MEJD), António Guterres, hateten, iha situasaun Corona Virus Disease 2019 (COVID-19) sai dezafiu boot ba atividade edukasaun iha Timor-Leste (TL), tanba atividade hotu-hotu paralizadu.

“COVID-19 sai dezafiu boot ba ita hotu, sente katak atividade hotu-hotu la’o paraliza hotu, ou labele la’o, maibé ita orgullu maske kondisaun mundu hotu agora sente no timor rasik sente iha situasaun krize ida ne’e“, Vise MEJD ne’e liu husi ninia diskursu iha loron mundiál siénsia no matemátika ba dala VIII iha Timor-Leste ne’ebé hala’o iha Eskola Bázika Sentrál 30 de Agosto, Comoro-Díli, Kinta ( 26/11/2020).

Ho situasaun refere, MEJD esforsu-an kontinua hatudu nafatin ninia espíritu, vontade no aten-barani, hodi dezenvolve atividade edukasaun iha Timor-Leste iha situasaun ida ne’e.

“Ita kontinua nafatin hatudu ita-nia espíritu, vontade, ita-nia aten-barani no la tauk, kontinua nafatin atu tulun ita-nia-oan sira, tanba ita hamutuk garantia no hametin nafatin kualidade edukasaun iha Timor-Leste. Maske ho situasaun krize ne’ebé ohin loron mundu enfrenta ha’u sujere ba estudante no profesór sira iha Timor laran tomak kontinua  dezenvolve siénsia ne’ebé iha ona ba iha futuru, nune’e bele dedika ba nasaun Timor-Leste”, salienta António.

Nune’e mós estudante Eskola Bázika Sentrál 30 de Agosto, Dania Terezinha  Guterres mós sente triste, tanba ho situasaun COVID-19 ne’e halo sira tuir prosesu aprendizajen la’o la normál.

“Ha’u sente triste ho situasaun COVID-19 ne’e, tanba uluk seidauk akontese moras ne’e iha Timor ami nia prosesu aprendizajen la’o loro-loron, maibé iha situasaun ida ne’e halo ami-nia prosesu aprendizajen iha eskola la’o la normál, tanba durante COVID-19 ne’e halo ami tama eskola semana ida no semana ida ami la tama, nune’e halo ami simu materia la kompletu“, tenik Dania. car