Hakarak proteje povu, PR Lú Olo dekreta EE

Chefe Casa Militar, Coronél António da Silva “Maucalo”, hateten, Prezidente Repúblika (PR), Francisco Guterres “Lú Olo” dekreta Estadu Emerjénsia (EE) ne’e, tanba hakarak proteje ninia povu husi Corona Virus Disease 2019 (COVID-19).

“Ita sei moris iha EE fulan ualu ona, ha’u deklara EE, tanba hakarak proteje ita-nia povu husi moras COVID-19”, Chefe Casa Militar ne’e liu husi ninia diskursu wainhira abertura Primeiru Asembleia Jerál Konsellu Kombatente Libertasaun Nasionál, Kuarta (18/11/2020), iha Kuartél Jenerál F-FDTL Fatuhada-Díli.

Maucalo haktuir, Xefe Estadu husu ba povu tomak atu tuir medida prevensaun hanesan uza máskara iha fatin públiku, fase-liman bei-beik ho sabaun no hado’ok-an husi kualker ema metru ida ho balun.

“Ita-nia saúde iha ita-nia liman rasik, ho saúde di’ak mak ita tau matan ba família no ba ita nia-komunidade no ba ita-nia paíz”, dehan Chefe Casa Militar ne’e.

Entretantu pandemia COVID-19 ne’ebé mosu iha Wuhan-Xina iha fulan Dezembru, tinan 2019, hamate ona ema rihun ba rihun iha mundu no Timor-Leste konsege rejista kazu COVID-19, maibé rekuperadu hotu ona. sis