Identifika ema tama-sai ilegál, Odete: Sidadaun sira tenke keixa ba parte kompetente

Koordenadora Jerál Corona Virus Disease 2019 (COVID-19), Odete da Silva Viegas, husu ba sidadaun hotu iha teritóriu Timor-Leste atu kontinua kumpre regra Estadu Emerjénsia (EE) no karik identifika sidadaun tama-sai ilegalmente iha fronteira, tenke foti asaun ou koordena ho parte Imigrasaun no Unidade Polísia Fronteira (UPF), nune’e bele submete sidadaun refere ba kuarentena.

“Globalmente COVID-19 ne’e sei eziste, nune’e ita ida-idak tenke nafatin matan-moris no neon-na’in, karik iha ema ruma mak tama ilegál liu husi liña fronteira ou bele ultrapasa tiha ona liña fronteira tama to’o iha sidade ka iha munisípiu, husu nafatin ba entidade relevante, autoridade lokál, liu-liu Xefe suku, Xefe aldeia no mós Diretór sira iha munisípiu atu bele foti asaun no koordenasaun ho imigrasaun, UPF, saúde sira atu hatama kedas ita-nia maluk sira ne’e iha kuarentena”, Koordenadora Jerál COVID-19 hato’o informasaun ne’e liu husi konferénsia imprensa iha salaun Palaçio das Cinzas, Caicoli-Díli, foin-la-lais ne’e.

Odete apela mós ba komunidade sira atu nafatin mantein kalma no sempre nafatin halo medida prevensaun, hanesan fase-liman no uza máskara wainhira ba iha fatin públiku.

Entretantu sidadaun Indonézia ne’ebé izola iha Vera Cruz, iha loron 26, fulan Outubru, tinan ne’e, ninia kondisaun saúde rekuperadu ona, tanba rezultadu teste hatudu negativu, nune’e sidadaun refere fila hikas ona ba ninia hela fatin.

Tuir dadus Ministériu Saúde (MS), iha loron 14, fulan Novembru, tinan ne’e, total númeru teste 12248, hein rezultadu 387, total kumulativu kazu 30, rekuperadu 29+4=33, kazu foun 0, rezultadu negativu 11831, totál ema ne’ebé kuarentena 222 iha Díli 179, munisípiu 43, auto kuarentena 267, iha Díli 266, munisípiu 1, pasa kuarentena 14 dias 6017, Díli 4966 no munisípiu 1051. ves