Ramos Horta: Kombate COVID-19 depende estratéjia ukun-nain sira

Eis Prezidente Repúblika, José Ramos Horta, hateten, atu kombate Corona Virus Disease 2019 (COVID-19) ne’e, depende ba estratéjia ukun-nain sira nian oinsa kria regra atu populasaun sira kumpre no labele prejudika fali populasaun sira rasik.

“Ita hotu hatene katak iha Prezidente Amérika Donald Trump nia tempu populasaun rihun ba rihun mak mate ona, tanba moras COVID-19 ne’e durante nia mandatu. Tanba ne’e ho Prezidente Estadu Unidu Amérika foun Joe Biden ema ne’ebé ho nível ida ho vizaun no estratéjika ho sira-nia rekursu no siénsia halo kedas parseria ho Europa, Japaun, India ho mos Xina, ita hamutuk tenta derota virus COVID-19 ne’e, sé lae COVID-19 sa’e maka’as número um mak EUA, ne’e duni atu kombate virus COVID-19 ne’e primeiru líder ne’ebé ukun rai tenke iha estratéjia ruma para bele kombate virus ne’e liu husi dalan saída ne’e depende ukun-nain sira iha dalan ka lae atu prevene moras ne’e, karik iha dalan oinsa mak kria regra ruma para sidadaun hotu bele tuir regra ne’e hodi prevene, maibé ukun-nain sira mós tenke kria kondisaun sira hotu para populasaun sira bele halo tuir regra sira ne’e”, hateten José Ramos Horta bainhira halo palestra iha Semináriu Nasionál ne’ebé organiza husi UNDIL iha Balide-Díli, Kinta (26/11/2020).

Eis Prezidente Repúblika, José Ramos Horta, konsidera, lideransa Xina nian iha kapasidade duni, tanba bele kontrola ninia populasaun hodi halo prevensaun ba  COVID-19.

“Ita haree moras COVID-19 ne’e nia hun mai husi Xina iha sidade Wuhan ne’ebé ho nia populasaun hamutuk um biliaun resin, maibé sira konsege kontrola no halo jestaun di’ak hodi kombate COVID-19 ne’e. Tanba ita akompaña virus iha Xina ne’e menus dau-daun ita kompara ho país sira hanesan Estadu Unidu Amérika (EUA), Brazil, Colombia, no sira seluk tan. Tanba ida ne’e lideransa Xina ninia matenek hodi hatudu ba mundu kona-bá sira-nia sistema polítika ba prevensaun COVID-19 no agora Xina mak organiza ninia doutor sira hodi haruka ajuda fali país sira ne’ebé moras COVID-19 ne’ebé loron ba loron sei aumenta hodi kombate virus ne’e”, deklara Ramos Horta.

Diplomata senior Timor-Leste ne’e mós informa, atu kombate COVID-19, líder sira ne’ebé ukun tenke iha kapasidade hodi kombate virus ne’e. aba